Phaltan Doctor Death : डॉक्टर महिलेच्या मोबाईलमधील पुराव्याबाबत मोठी माहिती समोर, Whats App चॅट अन् डायरी…

सातारा जिल्ह्यातील फलटण येथील महिला डॉक्टर प्रकरणात महत्त्वपूर्ण माहिती समोर आली आहे. पोलीस अधीक्षक तुषार दोशी यांनी स्पष्ट केले आहे की, संबंधित महिला डॉक्टरच्या मोबाईलमधील कोणतेही डिजिटल पुरावे डिलीट झालेले नाहीत. नातेवाईकांनी व्हॉट्सॲप चॅट्स डिलीट झाल्याचा आरोप केला होता, मात्र पोलिसांनी हे दावे फेटाळले आहेत. पोलिसांच्या तपासात महिला डॉक्टरची कोणतीही वैयक्तिक डायरी किंवा दैनंदिनी सापडलेली नाही, असेही स्पष्ट करण्यात आले आहे.

या प्रकरणी पोलिसांचा तपास अत्यंत काळजीपूर्वक सुरू आहे. पीडित महिलेच्या मोबाईलमधील सर्व डिजिटल पुरावे सायबर तज्ञांमार्फत तपासले जात आहेत. हे पुरावे कोणत्याही प्रकारे छेडछाड न करता सुरक्षित असल्याचे पोलिसांनी सांगितले. योग्य कायदेशीर प्रक्रियेनुसार, मोबाईलमधून मिळालेल्या तथ्यांची पडताळणी करून त्यातील आवश्यक पुरावे गोळा करण्याचे काम सुरू आहे. पोलिसांकडून मिळालेल्या माहितीनुसार, नातेवाईकांकडून करण्यात आलेले आरोप निराधार असून, तपास योग्य दिशेने सुरू आहे.