बहुमतावेळी शिंदे शिवसेनेचे सदस्य… न्यायमुर्ती बागची यांची महत्त्वाची टिप्पणी, सुनावणीदरम्यान मोठा ट्विस्ट

शिवसेना अपात्रता प्रकरणाच्या सर्वोच्च न्यायालयातील सुनावणीदरम्यान ॲडव्होकेट देवदत्त कामत यांनी महत्त्वपूर्ण युक्तिवाद सादर केला आहे. विधिमंडळ पक्ष (legislative party) आणि राजकीय पक्ष (political party) हे भिन्न घटक आहेत, यावर त्यांनी वारंवार भर दिला. बंडखोरी झाली तेव्हा मूळ राजकीय पक्ष कोण होता, हे निश्चित करणे महत्त्वाचे आहे, असे कामत म्हणाले. पक्षाचे प्रमुख सचिव यांसारख्या अंतर्गत रचनेची शिंदे गटाने पायमल्ली केली असल्याचा आरोप कामत यांनी केला. अपात्रतेची कारवाई होत असताना विधिमंडळ पक्ष हा राजकीय पक्ष असल्याचा दावा करून कारवाईपासून वाचता येणार नाही, असे त्यांचे प्रमुख म्हणणे होते.

या युक्तिवादामुळे राजकीय पक्षाची अंतर्गत संरचना आणि विधिमंडळातील त्याची भूमिका यावर नवीन प्रकाश टाकला गेला आहे. सुनावणीदरम्यान न्यायमूर्ती बागची यांनी कामत यांना महत्त्वाचे प्रश्न विचारले याआधी ते म्हणाले, शिंदेकडे बहुमत होतं याबाबत शंका नाही. बहुमतावेळी शिंदे शिवसेनेचे सदस्य होते का असा प्रश्न विचारला. आज आम्ही शिंदे यांना अपात्र घोषित करू शकतो का? आणि आम्ही शिक्षा रद्द करू शकतो, पण शिक्षा देऊ शकतो का? असे सवाल त्यांनी केले. यातून न्यायालयाच्या अधिकारांच्या मर्यादा आणि अध्यक्षांच्या भूमिकेवर विचारमंथन झाले. कामत यांच्या युक्तिवादामुळे या प्रकरणाला नवी दिशा मिळाली आहे.