Sangali : सांगलीची लेक हेलिकॉप्टरनं माहेरी, आटपाडी गावच्या जावयाच्या कुटुंबाचं असं झालं स्वागत!

सांगली जिल्ह्यातील आटपाडी येथे नुकताच एक अनोखा आणि हृदयस्पर्शी प्रसंग पाहायला मिळाला. आटपाडी गावचे जावई असलेले प्रसिद्ध उद्योजक शिवाजीराव आनंदराव पवार, त्यांची पत्नी शशिकला पवार आणि मुलांसह हेलिकॉप्टरने माहेरी आले. दुपारी आटपाडी गावामध्ये हेलिकॉप्टर उतरताच उपस्थितांनी या आगमनाची दखल घेतली. सांगली जिल्ह्यातील आटपाडीची लेक असलेल्या शशिकला पवार माहेरी हेलिकॉप्टरने आल्याने त्यांच्या कुटुंबीयांनी विशेष तयारी केली होती.

हेलिकॉप्टर गावात दाखल झाल्यावर, कुटुंबीयांनी मोठ्या उत्साहात त्यांचे स्वागत केले. केवळ शशिकला पवार आणि त्यांच्या कुटुंबाचेच नव्हे, तर ज्या हेलिकॉप्टरने ते आले होते, त्या हेलिकॉप्टरलाही फुलांचा हार घालून स्वागत करण्यात आले. कुटुंबीयांच्या या प्रेमळ आणि उत्साही स्वागतामुळे संपूर्ण परिसरात ही घटना चर्चेचा विषय बनली आहे. माहेरी आलेल्या लेकीचे असे अविस्मरणीय स्वागत पाहून गावकऱ्यांनीही आनंद व्यक्त केला.