Nashik : मातृत्वाला काळीमा… जन्मदात्या आईकडूनच पोटच्या 6 मुलांचा सौदा, पोरांना विकण्याच्या निर्णयानं त्र्यंबकेश्वरात खळबळ

नाशिक जिल्ह्यातील त्र्यंबकेश्वर तालुक्यातून एक धक्कादायक घटना समोर आली आहे, जिथे एका जन्मदात्या आईने आपल्या 12 पैकी सहा मुलांना विकल्याचा दावा सामाजिक कार्यकर्त्यांनी केला आहे. कुटुंबाची आर्थिक परिस्थिती अत्यंत हलाखीची असल्याने तिने हा निर्णय घेतल्याचा संशय व्यक्त होत आहे. नाशिकच्या जिल्हाधिकाऱ्यांनी या प्रकरणाची गंभीर दखल घेत सखोल चौकशीचे आदेश दिले आहेत. आरोग्य विभागाच्या माहितीनुसार, संबंधित महिलेची डिलिव्हरी झाल्यापासून आशा कार्यकर्तीची नेमणूक करण्यात आली होती. बाळ सुरक्षित घरी आणले गेले होते. मात्र, काही दिवसांनी आशा कार्यकर्ती बाळाचे वजन घेण्यासाठी गेली असता, त्यांना ते बाळ तिथे आढळले नाही. या संदर्भात आईला विचारणा केली असता, “आम्हाला मुलांना पोसणे परवडत नाही, म्हणून आम्ही त्यांना दत्तक म्हणून दिले,” असे तिने सांगितले.

महिलेने स्पष्ट केले की, तिला बाळाला दूध पाजणे शक्य नव्हते आणि आर्थिक अडचणींमुळे तिने हा निर्णय घेतला. मुलांच्या संख्येबाबत विचारले असता, तिने एकूण 12 मुलं होती असे सांगितले, त्यापैकी सहा विकल्याचा दावा आहे. सध्या तिच्याकडे पाच मुलं आणि सहा मुली असून, त्यापैकी दोन मुलींची लग्न झाली आहेत. ही घटना समाजातील दारिद्र्य आणि बाल हक्कांच्या संरक्षणाविषयी गंभीर प्रश्न निर्माण करते.