Solapur : शिवसेना जिल्हाप्रमुख महेश चिवटेंना बेदम मारहाण, गाडी अडवली अन्….करमाळ्यात कोणाकडून हल्ला?

सोलापूर जिल्ह्यातील करमाळा तालुक्यात शिवसेना जिल्हाप्रमुख महेश चिवटे यांच्यावर सकाळी हल्ला झाल्याची घटना घडली आहे. करमाळा तालुक्यातील हिवरवाडी येथे घडलेल्या या प्रकरणात महेश चिवटे यांनी मनोज लांडगे नावाच्या व्यक्तीवर हल्ला केल्याचा आरोप केला आहे. चिवटेंच्या म्हणण्यानुसार, मनोज लांडगेने त्यांची गाडी अडवून त्यांना बेदम मारहाण केली. यात लाथा-बुक्क्यांनी मारहाण करून खाली पाडल्याचे त्यांनी सांगितले.

हल्ला करणारा मनोज लांडगे हा शिवसेना नेते दिग्विजय बागल यांचा कार्यकर्ता असल्याचे महेश चिवटेंनी नमूद केले आहे. चिवटेंनी आरोप केला आहे की, मकाई कारखान्याच्या सर्वेसर्वा रश्मी बागल आणि दिग्विजय बागल यांनीच या हल्ल्याची सुपारी दिली होती आणि मनोज लांडगेने त्यांना जीवे मारण्याचा प्रयत्न केला.

हल्ल्यानंतर महेश चिवटे यांना करमाळा येथील उपजिल्हा रुग्णालयात दाखल करण्यात आले आहे. घटनेची माहिती मिळताच पोलीस निरीक्षक रणजीत माने यांनी घटनास्थळी धाव घेतली असून, या प्रकरणाचा तपास सुरू आहे. महेश चिवटे यांनी रश्मी बागल आणि दिग्विजय बागल यांना थेट इशारा दिला आहे की, अशा प्रकारच्या हल्ल्यांना जशास तसे उत्तर दिले जाईल.