Solapur : शेती उद्ध्वस्त, तरुण बेरोजगार अन्…; 30-35 वर्षांच्या पाणी संघर्षानंतर तुळशी गावकऱ्यांनी घेतला टोकाचा निर्णय…

सोलापूर जिल्ह्यातील माढा तालुक्यातील तुळशी गाव सध्या चर्चेत आले आहे. पिण्याच्या आणि शेतीच्या पाण्यासाठी ३०-३५ वर्षांपासून संघर्ष करणाऱ्या या गावकऱ्यांनी हताश होऊन चक्क “गाव विकायला काढले” असा फलक लावला आहे. अनेक वर्षांपासून पाणीटंचाईला सामोरे जात असलेल्या तुळशी गावाला, शिना माढा सिंचन योजना जवळून जात असूनही, जाणूनबुजून वगळण्यात आले असल्याचा ग्रामस्थांचा आरोप आहे.

या भीषण दुष्काळी परिस्थितीमुळे गावातील शेती उद्ध्वस्त झाली असून, तरुण नोकरीविना आणि अनेक युवक लग्नाच्या प्रतीक्षेत आहेत. पाण्यासाठी वारंवार आंदोलन करूनही राजकीय नेत्यांकडून केवळ आश्वासने मिळाली. आता गावकरी अंबानी, महिंद्रा किंवा टाटा यांसारख्या मोठ्या उद्योजकांनी गाव विकत घेऊन पाणी उपलब्ध करून द्यावे, अशी मागणी करत आहेत. पाणी मिळाले तरच गावात राहणे शक्य होईल, अन्यथा विस्थापित व्हावे लागेल, अशी त्यांची भूमिका आहे. राजकीय इच्छाशक्तीच्या अभावामुळे हा प्रश्न वर्षानुवर्षे प्रलंबित राहिला आहे. गावकऱ्यांची ही आर्त हाक आता कोणाचे लक्ष वेधून घेते, हे पाहणे महत्त्वाचे आहे.