निवडणूक आयोगाने पक्षचिन्ह दिलं नाही तरी… विलिनीकरणाच्या विषयावर शरद पवारांचं मोठं विधान

राष्ट्रवादी काँग्रेस पक्षाचे नाव आणि चिन्ह निवडणूक आयोगाने काढून घेतल्यानंतर शरद पवारांनी जोरदार भाषण करत आपला निर्धार व्यक्त केला. देशाच्या राजकारणात कधीही न घडलेली गोष्ट घडल्याचे ते म्हणाले. निवडणूक आयोगाच्या निष्पक्षतेवर प्रश्नचिन्ह उपस्थित करत, पूर्वी इंदिरा गांधींच्या काळात पक्षातील वाद सोडवताना स्वीकारलेली पद्धत यावेळी अवलंबली नसल्याचे त्यांनी नमूद केले. देश आणि महाराष्ट्रातील सत्ता योग्य मार्गाने आली नसून, ती फोडाफोडीच्या राजकारणातून आल्याचा आरोप पवारांनी केला.

पक्ष आणि चिन्ह गेले असले तरी लोक आपल्यासोबत आहेत आणि हा लढा लोकांच्या पाठिंब्यावर जिंकल्याशिवाय राहणार नाही, असा विश्वास त्यांनी व्यक्त केला. तुतारी वाजवणारा माणूस हे नवीन चिन्ह घेऊन आपण महाराष्ट्राच्या कानाकोपऱ्यात जनतेसमोर जाणार आहोत. बेरोजगारी, महागाई आणि शेतकरी आत्महत्या यासारख्या ज्वलंत प्रश्नांवर सत्ताधाऱ्यांचे लक्ष नसल्याची टीका त्यांनी केली. सत्तेचा गैरवापर करणाऱ्यांना जनतेच्या माध्यमातून उत्तर देण्याचा निर्धार पवारांनी व्यक्त केला.