Phaltan Doctor Death : 9 वेळा ‘तो’ शब्द चुकला, अंधारेंनी दाखवला थेट पुरावा, केला दावा ज्यानं उडाली खळबळ

सातारा जिल्ह्यातील फलटण येथे घडलेल्या महिला डॉक्टरच्या मृत्यू प्रकरणासंदर्भात सुषमा अंधारे यांनी महत्त्वपूर्ण दावे केले आहेत. मृत तरुणीने हातावर लिहिलेल्या सुसाईड नोटमधील हस्ताक्षर आणि तिच्या चार पानी पत्रातील हस्ताक्षरात तफावत असल्याचा आरोप अंधारे यांनी केला. विशेषतः, निरीक्षक या शब्दाच्या वेलांटीमध्ये दोन्ही ठिकाणी फरक दिसून येतो, असे त्यांनी निदर्शनास आणून दिले. याचबरोबर, मृत्यूच्या वेळेबद्दलही त्यांनी प्रश्नचिन्ह उपस्थित केले.

पोलिसांनी मृत्यूची वेळ सायंकाळी ७ वाजताची सांगितली असताना, मृत तरुणीच्या मोबाईलवरून रात्री ११ वाजून ६ मिनिटांनी एका व्हॉट्सॲप स्टेटसला लाईक केले गेल्याचे स्क्रीनशॉट समोर आणले. यामुळे पोलीस काही माहिती लपवण्याचा प्रयत्न करत असल्याचा संशय त्यांनी व्यक्त केला. या प्रकरणी स्थानिक पोलिसांवर संशय असल्याने, उच्च न्यायालयाने उच्चस्तरीय समितीमार्फत तपास करावा अशी मागणी सुषमा अंधारे यांनी केली आहे. त्यांनी मृत तरुणीच्या आई-वडिलांनाही धीर देत, या अन्यायाविरुद्ध लढण्यासाठी पाठिंबा दिला.