Maharashtra Politics : भाजपचा ठाकरेंना दे धक्का… शिंदेंच्या उमेदवारांविरोधात लढणारे ठाकरेंचे 2 शिलेदार कमळ घेणार हाती

डोंबिवलीमध्ये भाजपकडून एकनाथ शिंदे आणि उद्धव ठाकरे यांच्या शिवसेनेला धक्का दिल्यानंतर भाजपनं मालेगावमध्येही उद्धव ठाकरे यांना धक्का दिला आहे. मालेगाव येथील अद्वय हिरे आणि छत्रपती संभाजीनगरमधील राजू शिंदे यांनी भाजपमध्ये प्रवेश केला आहे. एकनाथ शिंदे यांच्या उमेदवारांविरोधात निवडणूक लढणारे ठाकरेंचे दोन खंदे शिलेदार भाजपचं कमळ हाती घेणार आहेत. या दोन्ही नेत्यांनी यापूर्वी अनुक्रमे दादा भुसे आणि संजय शिरसाट यांच्या विरोधात निवडणूक लढवली होती. भाजप प्रदेशाध्यक्ष रवींद्र चव्हाण यांच्या उपस्थितीत आज दुपारी तीन वाजता त्यांचा भाजपमध्ये पक्षप्रवेश होणार आहे. आगामी स्थानिक स्वराज्य संस्था आणि विधानसभा निवडणुकांच्या दृष्टीने भाजपसाठी हा महत्त्वाचा राजकीय लाभ मानला जात आहे.