Shivsena ubt | गटार पूजन करत ठाकरे सेनेचा संताप; ठाणे पालिकेविरोधात अनोखं आंदोलन!

ठाणे जिल्ह्यातील दिवा परिसरात नालेसफाईच्या कामांवरून राजकीय वातावरण तापले आहे. शिवसेना (उद्धव बाळासाहेब ठाकरे) पक्षाने ठाणे महानगरपालिकेविरोधात अनोखे आंदोलन छेडले आहे. नालेसफाईची कामे अपूर्ण आणि निकृष्ट पद्धतीने केल्याचा आरोप करत ठाकरे गटाच्या कार्यकर्त्यांनी ‘गटार पूजन’ करून प्रशासनाचा निषेध नोंदवला.

दिवा परिसरात पावसाळ्यापूर्वी करण्यात येणारी नालेसफाईची कामे अद्याप पूर्ण झालेली नाहीत. अनेक ठिकाणी गटारे आणि नाले साफ न केल्याने पावसाळ्यात नागरिकांना पूरस्थिती आणि पाणी साचण्याच्या समस्येला सामोरे जावे लागू शकते, असा आरोप ठाकरे गटाकडून करण्यात आला आहे. याच पार्श्वभूमीवर ठाकरे सेनेच्या पदाधिकाऱ्यांनी आणि कार्यकर्त्यांनी संबंधित ठिकाणी जाऊन प्रतीकात्मक स्वरूपात गटार पूजन केले. या माध्यमातून त्यांनी ठाणे महानगरपालिकेच्या कारभाराविरोधात संताप व्यक्त करत प्रशासनाचे लक्ष वेधण्याचा प्रयत्न केला.

आंदोलनादरम्यान कार्यकर्त्यांनी घोषणाबाजी करत नालेसफाईची अपूर्ण कामे तातडीने पूर्ण करण्याची मागणी केली. नागरिकांच्या सुरक्षेशी संबंधित प्रश्नांकडे प्रशासन दुर्लक्ष करत असल्याचा आरोपही यावेळी करण्यात आला. दरम्यान, या अनोख्या आंदोलनामुळे दिवा परिसरात राजकीय चर्चांना उधाण आले असून, नालेसफाईच्या कामांबाबत ठाणे महानगरपालिका काय भूमिका घेते याकडे नागरिकांचे लक्ष लागले आहे.