Harshwardhan Sapkal : बालिश, नवखे सपकाळ… ॐ, स्वस्तिकची ‘पंजा’शी तुलना करताच आचार्य तुषार भोसलेंचा हल्लाबोल

महाराष्ट्राच्या राजकारणात काँग्रेस नेते हर्षवर्धन सपकाळ यांच्या एका वक्तव्यामुळे नवीन वादळ उठले आहे. सपकाळ यांनी ॐ आणि स्वस्तिक या पवित्र हिंदू चिन्हांप्रमाणेच हाताचा पंजा हे देखील एक चिन्ह असल्याचे वक्तव्य केले. त्यांच्या या तुलनेमुळे हिंदू धर्मियांच्या भावना दुखावल्या गेल्याचा आरोप आचार्य तुषार भोसले यांनी केला आहे. भोसले यांनी सपकाळांच्या वक्तव्यावर तीव्र शब्दांत टीका करत समाज माध्यमांवर आपली नाराजी व्यक्त केली आहे.

आचार्य तुषार भोसले यांनी आपल्या ट्वीटमध्ये म्हटले आहे की, “काँग्रेसच्या बालिश प्रदेशाध्यक्षांनी हिंदू धर्मियांच्या पवित्र ॐ आणि स्वस्तिकला थेट पंजासोबत जोडले. त्यामुळे हिंदूंच्या भावनांवर मोठा आघात झाला आहे. अहो नवखे सपकाळ, तुमच्या राजकीय पक्षाच्या चिन्हाला तुम्ही थेट आमच्या पूजनीय मानकांशी जोडताना थोडी तरी लाज बाळगा. एक गोष्ट लक्षात ठेवा. हिंदूंच्या भावनांचा कायम अपमान केल्यामुळेच तुमचा पंजा डबघाईला गेला आहे आणि जर तुम्ही अजूनही सुधारला नाहीत, तर हा पंजा एक दिवस कायमचा इतिहासजमा होऊन जाईल.” भोसले यांच्या या आक्रमक भूमिकेने सपकाळांवरील टीका अधिक तीव्र झाली आहे. राज्याच्या राजकारणात धार्मिक भावनांचा आदर आणि राजकीय वक्तव्यांची मर्यादा यावर पुन्हा एकदा चर्चा सुरू झाली आहे.