Uttar Pradesh : उत्तर प्रदेशात मुसळधार पावसाचा कहर; 48 तासांत 15 बळी, शेकडो कुटुंबांवर संकट

उत्तर प्रदेशात मुसळधार पावसामुळे जनजीवन मोठ्या प्रमाणावर विस्कळीत झाले आहे. संततधार पावसामुळे अनेक भागांमध्ये पूरसदृश स्थिती निर्माण झाली असून, जनजीवन ठप्प झाले आहे. पावसामुळे घडलेल्या विविध दुर्घटनांमध्ये गेल्या 48 तासांत 15 जणांनी आपले प्राण गमावले आहेत, तर 5 जण गंभीर जखमी झाले आहेत. मृतांचा आकडा वाढण्याची भीती व्यक्त केली जात आहे.

या नैसर्गिक आपत्तीमध्ये मोठ्या प्रमाणावर वित्तहानी देखील झाली आहे. मिळालेल्या माहितीनुसार, राज्यात आतापर्यंत 117 कच्ची घरे कोसळली आहेत. यामुळे अनेक कुटुंबे बेघर झाली असून, त्यांना सुरक्षित ठिकाणी हलवण्याचे प्रयत्न सुरू आहेत.

उत्तर प्रदेशातील एकूण 63 जिल्ह्यांमध्ये सरासरी पेक्षा कित्येक पटीने जास्त पावसाची नोंद झाली आहे, ज्यामुळे परिस्थिती आणखी बिकट झाली आहे. हवामान खात्याने राज्यातील परिस्थितीचे गांभीर्य लक्षात घेऊन महत्त्वाचे अलर्ट जारी केले आहेत. त्यानुसार, आजही 8 जिल्ह्यांसाठी रेड अलर्ट तर 13 जिल्ह्यांसाठी ऑरेंज अलर्ट जारी करण्यात आला आहे. नागरिकांनी सतर्क राहावे आणि आवश्यक ती काळजी घ्यावी, असे आवाहन प्रशासनाने केले आहे.