Vivekanand Patil : गोकुळच्या षडयंत्रामागे पुण्याच्या दादांचा हात; विवेकानंद पाटलांचा रोख कोणाकडे?

गोकुळ दूध संघातील नामनिर्देशित सदस्यांना मतदानाचा अधिकार देण्याच्या मुद्द्यावरून सध्या राजकीय वातावरण तापले आहे. युवा नेते विवेकानंद पाटील यांनी या निर्णयावर तीव्र आक्षेप घेत, याला दूध उत्पादकांवर अन्याय असल्याचे म्हटले आहे. पाटील यांच्या मते, नामनिर्देशित सदस्य निवडून येणाऱ्या चेअरमनला चोरमन बनवण्याचा प्रयत्न करत आहेत.

पाटील यांनी यामागे एका मोठ्या षडयंत्राचा आरोप केला आहे, ज्यामध्ये पुण्यात राहणाऱ्या एका मंत्र्याचा हात असल्याचा त्यांचा दावा आहे. “त्यांना शेतकऱ्यांचा कळवळा असेल, तर त्यांनी आमच्या गोट्यातील मारक्या गाईची धार काढून दाखवावी”, असे आव्हानही पाटील यांनी दिले. त्यांनी नामनिर्देशित सदस्यांना “गोकुळवरती डोळा ठेवलेली मांजरं” असे संबोधले.

मुख्यमंत्र्यांच्या भूमिकेवरही पाटील यांनी प्रश्नचिन्ह उपस्थित केले आहे. “आम्हाला यात पडायचे नाही असे मुख्यमंत्री म्हणतात, तर मग एका रात्रीत अध्यादेश कसा पारित झाला?”, असा सवाल त्यांनी केला. शेतकऱ्यांच्या हितासाठी या षडयंत्राला संघटितपणे विरोध करण्याचे आवाहन विवेकानंद पाटील यांनी केले आहे.