Gram Panchayat Election : ग्रामपंचायत निवडणुकीत ग्रामपंचायतींवर कुणाचा झेंडा फडकणार?

मुंबई, ५ नोव्हेंबर २०२३ | राज्यभरात आज ग्रामपंचायत निवडणुकीचं मतदान पार पडलं. राज्यभरात आज दिवसभरात २ हजार ३५९ ग्रामपंचायतींसाठी मतदान प्रक्रिया पार पडली. इतकंच नाही तर शंभरहून अधिक सरपंचपदाच्या रिक्त पदांसाठी मतदान पूर्ण झालं आहे. २ हजार ६८ ग्रामपंचायतींमधील २ हजार ९५० ग्रामपंचायत सदस्यांच्या जागेसाठी पोट निवडणुकसुद्धा घेण्यात आली. राज्यातील काही मतदान केंद्र वगळता इतर ठिकाणी शांततेच मतदानाची प्रक्रिया सुरळीतरित्या पार पडली. राज्यातील आज झालेल्या निवडणुकीच्या मतदान प्रक्रियेत संध्याकाळपर्यंत आलेल्या आकडेवारीनुसार साधारण सरासरी ७४ टक्के मतदान झाल्याची माहिती मिळाली. आता आपल्या ग्रामपंचायतींवर कुणाचा झेंडा फडकणार याकडे उमेदवारांसह कार्यकर्त्यांचं लक्ष लागलं आहे. या निवडणुकीमध्ये अनेक दिग्गज राजकीय नेत्यांची प्रतिष्ठा पणाला लागली आहे. यामध्ये अजित पवार, हर्षवर्धन पाटील, दिलीप वळसे पाटील, धनंजय मुंडे, पंकजा मुंडे यांसह आदी नेते मंडळींचा समावेश आहे.