विसरभोळ्या कर्मचार्यांसाठी EPFO चे ‘ब्रह्मास्त्र’! E-PRAAPTI पोर्टलवरून झटपट मिळेल पीएफचा पैसा
EPFO E PRAAPTI Portal Launch: ईपीएफओने विसरभोळ्या कर्मचाऱ्यांसाठी एक महत्त्वाची अपडेट समोर आणली आहे. या महिन्याच्या अखेरपर्यंत E-PRAAPTI पोर्टल लाँच होईल. यामुळे जुन्या आणि निष्क्रिय पीएफ खात्यातील अडकलेली 9,330 कोटी रुपयांहून अधिकची रक्कम मिळण्याचा मार्ग मोकळा होईल.
अनेकदा नोकरी बदलल्यानंतर लोक त्यांचे जुने पीएफ (PF) खाते नवीन कंपनीत हस्तांतरीत करणे विसरतात. अथवा काहींचे खाते निष्क्रिय होते. त्यामध्ये पीएफ योगदान अडकते. कोट्यवधी कर्मचाऱ्यांचे पीएफ खात्यातील पैसे अडकलेले आहेत. केंद्र सरकार आणि कर्मचारी भविष्य निर्वाह निधी संघटनेने (EPFO) त्यावर तोडगा शोधला आहे. ऑगस्टपर्यंत एक नवीन डिजिटल प्लॅटफॉर्म EPFO E-PRAAPTI Portal Launch करण्यात येणार आहे. हे पोर्टल विशेष करून जुनी खाती आणि बंद पडलेली खाती पुन्हा सक्रिय करण्यात मोलाची भर घालेल. ज्यांची खाती सध्याच्या युनिव्हर्सल अकाऊंट नंबरशी (UAN) लिंक नाहीत, त्यांना पीएफ खात्यातील रक्कम काढता येईल. जुन्या आणि निष्क्रिय पीएफ खात्यातील अडकलेली 9,330 कोटी रुपयांहून अधिकची रक्कम मिळण्याचा मार्ग मोकळा होईल.
EPFO E-PRAAPTI पोर्टल आहे काय?
‘EPF Aadhaar-Based Access Portal for Tracking Inoperative Accounts’ म्हणजे ई-प्राप्ती आहे. जुन्या आणि निष्क्रिय पीएफ खाती शोधण्यासाठी विसरभोळ्या कर्मचाऱ्यांना या पोर्टलचा वापर करता येईल. कामगार आणि रोजगार मंत्री मनसुख मांडविया यांनी या पोर्टलची घोषणा केली होती. हे पोर्टल या ऑगस्टच्या अखेरीस सुरू होणार आहे. त्यापूर्वी ईपीएफओ राष्ट्रीय डेटाबेस तयार करत आहे. त्यासाठी बँक आणि सॉफ्टवेअर अपडेट करण्यात येत आहे. यासंबंधीची चाचणी करण्यात येत आहे.
आता कंपनीत जाण्याची नाही गरज
जुन्या PF खात्यातून पैसे काढण्यासाठी अथवा ही रक्कम हस्तांतरीत करण्यासाठी सर्वात मोठी अडचण ही कर्मचारी ओळखण्याची होती. पण ई-प्राप्तीने ही अडचण दूर केली आहे.
1. आधार-बेस्ड व्हेरिफिकेशन: हे पोर्टल आधारद्वारे(Aadhaar) प्रमाणीकरण प्रणालीवर काम करते. म्हणजे जुन्या पीएफ खात्याच्या प्रमाणीकरणासाठी आधार कार्डच ओळखीसाठी महत्त्वाचे असेल.
2. कागदी कवायत संपणार: या नवीन पोर्टलमुळे यापूर्वीची मोठी कागदी कवायत संपेल. ईपीएफओ आणि जुन्या कंपनीतील एचआरकडे वारंवार फेरी मारावी लागणार नाही.
पीएफ खात्यात 9,330 कोटींहून अधिकची रक्कम अडकली
पीएफ खात्यात अनेकांचे पैसे अडकले आहेत. सध्याच्या आकडेवारीनुसार, 30.91 लाखांहून अधिक पीएफ खाती निष्क्रिय आहेत. त्यातील कर्मचाऱ्यांचे जवळपास 9,330 कोटी रुपये अडकले आहेत. ईपीएफच्या नियमानुसार, सलग तीन वर्षे खात्यात योगदान झाले नाही तर ते खाते निष्क्रिय होते. E-PRAAPTI पोर्टलचे मुख्य उद्देश ही रक्कम संबंधित कर्मचाऱ्यांना परत करणे हा आहे. कर्मचारी भविष्य निर्वाह निधी संघटना हा एक नवीन डिजिटल प्लॅटफॉर्म आणत आहे.
