Gold Rate : सोन्याचा भाव थेट दीड लाखांच्या पुढे, भविष्यात सामान्यांना.., सर्वात मोठी अपडेट समोर!
गेल्या काही दिवसांपासून सोने आणि चांदीच्या भावात चढउतार होताना पाहायला मिळतोय. असे असतानाच आता सोन्याच भाव थेट दीड लाखांच्याही पुढे जाण्याची शक्यता व्यक्त केली जात आहे.
Gold And Silver Rate : सध्या सोने आणि चांदी या दोन मौल्यवान धातूंचा भाव कधी वाढताना दिसतोय. तर कधी या दोन धातूंमध्ये मोठी घसरण होताना पाहायला मिळत आहे. भारतामध्ये सोन्याला फारच महत्त्व आहे. अनेकजण या धातूकडे सुरक्षित गुंतवणूक म्हणून पाहतात. तर काही लोक सोन्याची आभूषणं करून अंगावर परिधान करतात. म्हणूनच सोन्याचा भाव वधारला की त्याचा सामान्यांवर परिणाम होतो. तुम्ही सोन्यात गुंतवणूक करण्याचा किंवा दागिने खरेदी करण्याचा विचार करत असाल तर ही बातमी तुमच्यासाठी फार महत्त्वाची आहे. 6 डिसेंबर रोजी सराफा बाजारात सोन्याची चमक वाढलेली पाहायला मिळाली. तर चांदीचा भाव काहीसा कमी झाला. दरम्यान, सध्या सोन्याच्या भावात होत असलेला चढउतार आणि जागतिक घडामोडी लक्षात घेता, सोन्याचा भाव लवकरच दीड लाख रुपयांच्याही पुढे जाण्याची शक्यता व्यक्त केली जात आहे. ही शक्यता खरी ठरली तर सामान्यांच्या खिशाला चांगलीच झळ बसणार आहे.
सध्या सोन्याचा भाव काय?
आज राजधानी दिल्लीमध्ये सोन्याने नवा रेकॉर्ड स्थापित केला. 24 कॅरेट सोन्याचा भाव 1,30,000 रुपयांच्याही पुढे गेला. तज्ज्ञांच्या मते अलिकडच्या दिवसात सोन्याच्या भावात घसरण होण्याची शक्यता कमी आहे. सेन्को गोल्डचे एमडी आणि सीईओ सुवंकर सेन यांच्या मतानुसार जागतिक बाजारातील घडामोडी पुरक राहिल्या तर लवकरच सोन्याचा भाव थेट 1.50 लाख रुपये प्रति दहा ग्रॅमवर पोहोचू शकतो. तशी शक्यता व्यक्त केली जात आहे.
मुंबईत सोन्याचा भाव काय?
राजधानी दिल्लीमध्ये 24 कॅरेट सोन्याचा भाव 1,30,090 रुपये प्रति 10 ग्रॅमवर पोहोचला आहे. तर 22 कॅरेट सोन्याची किंमत 1,19,260 प्रति दहा ग्रॅम झाली आहे. दुसरीकडे मुंबई, चेन्नई, कोलकाता या मोठ्या शहरांमध्ये 22 कॅरेट सोन्याचा भाव 1,19,110 रुपये प्रति 10 ग्रॅमवर पोहोचला आहे.
चांदीचा भाव काय?
आज सोन्याचा भाव वाढलेला पाहायला मिळाला. पण चांदीचा भाव मात्र काहीसा कमी झाला. देशांतर्गत बाजारात चांदीचा भाव 1,86,900 रुपये प्रति किलोवर पोहोचला आहे.
सोनं का महाग होतंय?
गेल्या काही दिवसांपासून सोन्याच्या भावत चढ-उतार पाहायला मिळत असले तरी एकंदरीत सोन्याची चकाकी आणखी वाढतानाच दिसत आहे. त्याला देशांतर्गत घडामोडी तसेच आंतरराष्ट्रीय बाजारात होत असलेले बदल कारणीभूत ठरत आहे. सध्या अमेरिकेची अर्थव्यवस्था मंदावली आहे. त्यामुळे अमेरिकेची मध्यवर्ती बँक फेडरल रिझर्व्ह वलकरच व्याजदरात कपात करण्याची शक्यता आहे. त्यामुळे लोकांचा सोन्यासारख्या सुरक्षित गुंतवणुकीकडे कल वाढतो आहे. त्यामुळेच आगामी काळात सोन्याचा भाव दीड लाखांपेक्षा जास्त वाढण्याची शक्यता व्यक्त केली जात आहे.
(टीप- वरच्या लेखात दिलेली माहिती ही प्राथमिक स्वरुपाची आहे. कुठेही प्रत्यक्ष वा अप्रत्यक्ष गुंतवणूक करायची असेल किंवा कोणताही आर्थिक निर्णय घ्यायचा असेल तर त्या-त्या क्षेत्रातील तज्ज्ञांचा सल्ला जरूर घ्या)
