Gold Silver Rate Today : सणासुदीत ग्राहकांचा हिरमोड! सोने-चांदी सूसाट

नवी दिल्ली | 20 सप्टेंबर 2023 : घडीभर उसंत न घेता सोने-चांदीने (Gold Silver Price Today 20 September 2023) मुसंडी मारली आहे. दोन्ही मौल्यवान धातूंनी सलग पाचव्या दिवशी पण धावफलक हालता ठेवला. बऱ्याच कालावधीनंतर सोने-चांदी तब्येतीने मैदानावर टिकून आहेत. दमदार बॅटिंगच्या जोरावर त्यांनी धावफलकावरील आकडे उंचावले आहेत. 15 सप्टेंबरपासून सोन्याने मोठी धावसंख्या उभारली आहे. सोन्याला चांदीची पण साथ मिळाल्याने दोन्ही धातूंनी कमाल केली आहे. सराफा बाजारात गणेश चतुर्थीचा मुहूर्त साधणाऱ्या ग्राहकांचा खिसा चांगला खाली झाली. त्यांना गेल्या आठवड्यापेक्षा अधिक खर्च करावा लागला. जागतिक परिमाणं मोडीत काढत सोने-चांदीने धुमाकूळ घातला आहे. ऑगस्ट महिन्याच्या शेवटच्या सत्रात दोन्ही धातूंनी अशीच बॅटिंग केली होती. सोने-चांदीत गेल्या पाच दिवसांत इतकी दरवाढ झाली आहे.

सोन्याची जोरदार कामगिरी

गुडरिटर्न्सनुसार, सप्टेंबर महिन्यात सोन्याची सुरुवात अडखळत झाली. पंधरा दिवसांत घसरणीच्या सत्राने भाव कमी झाले होते. शुक्रवारी 15 सप्टेंबरला सोन्याने पहिल्यांदा त्याला खिंडार पाडले. 15 आणि 16 सप्टेंबर रोजी सोन्यात प्रत्येकी 200 रुपयांची वाढ झाली. 17 आणि 18 सप्टेंबर रोजी सोने 150 रुपयांनी वधारले. 19 सप्टेंबर रोजी 150 रुपयांनी दर वधारले. या पाच दिवसांत 700 रुपयांची दरवाढ झाली. 22 कॅरेट सोने 55350 रुपये प्रति 10 ग्रॅम तर 24 कॅरेट सोन्याचा भाव 60,370 रुपये प्रति 10 ग्रॅम असा भाव आहे.

चांदीत 1000 रुपयांची वाढ

सप्टेंबर महिन्याच्या सुरुवातीला 5000 रुपयांनी स्वस्त झाली होती. गेल्या पंधरा दिवसांत चांदीत घसरणीचे सत्र सुरु होते. 15 आणि 16 सप्टेंबर रोजी चांदीत 1200 रुपयांची दरवाढ झाली. तर 18 सप्टेंबर रोजी 200 रुपयांनी किंमती घसरल्या. 19 सप्टेंबररोजी चांदीने 300 रुपयांची दरवाढ नोंदवली. गुडरिटर्न्सनुसार, सध्या एक किलो चांदीचा भाव 74,800 रुपये आहे.

14 ते 24 कॅरेट सोन्याचा भाव

इंडियन बुलियन्स अँड ज्वेलर्स असोसिएशननुसार, 24 कॅरेट सोने 59,324 रुपयांपर्यंत घसरले. 23 कॅरेट 59,086 रुपये, 22 कॅरेट सोने 54341 रुपये, 18 कॅरेट 44,493 रुपये, 14 कॅरेट सोने 34,705 रुपये प्रति 10 ग्रॅमवर पोहचले. एक किलो चांदीचा भाव 72,212 रुपयांपर्यंत झाला. वायदे बाजारात आणि आंतरराष्ट्रीय बाजारात सोने आणि चांदीवर कुठलाही कर, शुल्क नसते. तर सराफा बाजारात शुल्क आणि कराचा समावेश होत असल्याने भावात तफावत दिसून येते.

किंमती मिस्ड कॉलवर

22 कॅरेट आणि 18 कॅरेट सोने खरेदी करण्यापूर्वी त्याच्या किंमती एका मिस्ड कॉलवर कळतील. तुम्ही 8955664433 या क्रमांकावर मिस्ड कॉल करु शकता. त्यानंतर तुमच्या मोबाईल क्रमांकावर एसएमएस (SMS) येईल. त्याआधारे तुम्हाला किंमती कळतील. तसेच भाव जाणून घेण्यासाठी तुम्ही www.ibja.co वा ibjarates.com या ठिकाणी माहिती घेऊ शकता.