Share Market: केवळ एक बातमी आली अन्…. शेअर मार्केटमध्ये असं काय घडलं? दिवाळं निघालं की दिवाळी?

देशातील सर्वात मोठी विमा कंपनी असलेल्या एलआयसीचे शेअर्स मंगळवारी बाजार उघडताच कोसळले. मोठ्या प्रमाणात झालेल्या विक्रीमुळे एलआयसीच्या शेअर्समध्ये जवळपास 9% ची घसरण झाली. ही घसरण एकाच बातमीमुळे झाली. मिळालेल्या माहितीनुसार, सरकार एलआयसीमधील आपला हिस्सा सध्याच्या बाजारभावापेक्षा खूपच कमी किमतीत विकत आहे, ज्यामुळे गुंतवणूकदारांच्या भावनांवर पाणी फिरले आहे. सरकारच्या हिस्सा विक्रीच्या योजनेनुसार, एलआयसीमधील 6.5% हिस्सा विकण्याची सरकारची योजना आहे. सुरुवातीला, सरकार ओएफएस द्वारे एलआयसीमधील 2% हिस्सा विकत आहे आणि पुरेशी मागणी असल्यास 4.5% पर्यंत हिस्सा विकण्याचा पर्याय खुला ठेवला आहे. सरकारने एलआयसीच्या ऑफर फॉर सेलसाठी प्रति शेअर 382 रुपये किमान किंमत निश्चित केली आहे. परिणामी, या हिस्सा विक्रीतून अंदाजे 31,400 कोटी रुपये उभारण्याची सरकारची योजना आहे.

एलआयसीच्या शेअर घसरणीमागील सर्वात मोठे कारण म्हणजे ओएफएसद्वारे विकले जाणारे शेअर्स सोमवारच्या बाजार बंद भावापेक्षा अंदाजे 11% कमी दराने विकले जात आहेत. 2022 मध्ये एलआयसीच्या आयपीओनंतरही सरकारने विमा कंपनीतील बहुसंख्य हिस्सा कायम ठेवला आहे, सध्या एलआयसीमध्ये सरकारचा 96.5% हिस्सा आहे. सार्वजनिक भागधारकांकडे केवळ 3.5% हिस्सा आहे. एलआयसीला आपला किमान सार्वजनिक शेअरहोल्डिंग 10% पर्यंत वाढवण्यासाठी मे 2027 पर्यंतची मुदत देण्यात आली आहे. जर सरकारने ओएफएसमधील संपूर्ण 6.5% पर्यायाचा वापर केला, तर एलआयसीची ही अट पूर्ण होईल.

एलआयसीचा शेअर सोमवारी ₹424.40 वर बंद झाला आणि मंगळवारी ट्रेडिंग सुरू होताच तो घसरून ₹392 वर आला आणि दुसऱ्या दिवशी पुन्हा ₹390 वर आला. एलआयसीच्या शेअर्समधील या घसरणीचा थेट परिणाम कंपनीच्या बाजार मूल्यावर झाला, जे ₹5.03 लाख कोटींपर्यंत घसरले. एलआयसीची ओएफएस मंगळवार, 4 ऑगस्ट रोजी गैर-किरकोळ गुंतवणूकदारांसाठी खुली झाली. ती बुधवारी किरकोळ गुंतवणूकदारांसाठी खुली होईल. जेव्हा एखादा प्रमुख भागधारक ओएफएसद्वारे लक्षणीय सवलतीत शेअर्स देऊ करतो, तेव्हा सामान्यतः बाजारभावावर दबाव येतो, कारण गुंतवणूकदारांना खुल्या बाजारात जास्त किमतीत स्टॉक खरेदी करण्यास फारसे प्रोत्साहन मिळत नाही. हाच ट्रेंड एलआयसीच्या स्टॉकच्या बाबतीतही दिसून आला आहे, ज्यामुळे स्टॉक क्रॅश झाला आहे.