Success Story: 38,000 ची नोकरी सोडली आणि चहाचा धंदा सुरु केला, आता महिन्याला कमावतो लाखो रुपये

आजच्या जगात, जिथे लोक सतत सुरक्षित नोकरीच्या शोधात असतात, तिथे काही जण स्वतःचे भविष्य घडवण्याचे धाडस करतात. अंकित पांडे नावाच्या एका यूजरची एक पोस्ट ‘एक्स’ या सोशल मीडिया प्लॅटफॉर्मवर व्हायरल होत आहे. त्यात त्याने सांगितले आहे की, त्याच्या शेजाऱ्याने महिन्याला 38,000 रुपये पगार असलेली नोकरी सोडून एक यशस्वी व्यवसाय सुरू केला. आता तो 1,00,000 रुपये कमावतो. अंकितच्या म्हणण्यानुसार, त्याचा शेजारी पूर्वी ‘टेलिपरफॉर्मन्स’मध्ये काम करत होता आणि त्याला महिन्याला सुमारे 38,000 रुपये पगार मिळत होता. त्यांच्या व्यस्त वेळापत्रकामुळे त्यांच्यात फारसा संवाद होत नव्हता. या वर्षी मे महिन्यात, त्याच्या शेजाऱ्याने नोकरीचा राजीनामा दिला. जेव्हा त्याने नोकरी सोडली, तेव्हा त्याच्या आजूबाजूच्या लोकांना आणि ओळखीच्या लोकांना वाटले की तो स्वतःच्या पायावर कुऱ्हाड मारून घेत आहे आणि एक मोठी चूक करत आहे.

इतरांच्या दबावाला न जुमानता, तो आपल्या निर्णयावर ठाम राहिला. त्याने सुमारे 2 लाख रुपये गुंतवले आणि एका ऑटो स्टँडजवळ एक सुंदर डिझाइन केलेला चहाचा स्टॉल उघडला. दोन महिला कर्मचारी कामावर ठेवल्या. तो साधा चहा ₹10 ला आणि प्रीमियम चहा ₹20 ला विकतो.दुकान उघडल्याबरोबरच त्याची कल्पना यशस्वी ठरली. आज, त्याच्या स्टॉलवर दररोज सुमारे 400 कप चहा विकला जातो. यामुळे त्याचे दैनंदिन उत्पन्न सुमारे ₹6,000 होते, म्हणजेच त्याची मासिक उलाढाल अंदाजे ₹1.8 लाख होते.

दुकानाचे भाडे: ₹25,000, कर्मचाऱ्यांचे पगार: ₹30,000, वीज आणि कच्चा माल (दूध, साखर, चहापत्ती, इत्यादी): 25,000, निव्वळ नफा: ₹1 लाख. हे सर्व खर्च वजा केल्यावरही, त्याला दरमहा सुमारे ₹1 लाख निव्वळ नफा मिळतो. ही रक्कम त्याच्या आधीच्या पगाराच्या (₹38,000) जवळपास अडीच पट आहे.

आता त्याने एक नवीन व्यवसाय सुरू केला आहे. ही गोष्ट फक्त चहापुरती मर्यादित नाही. आपल्या यशस्वी व्यवसायानंतर त्याने त्याचा आणखी विस्तार केला आहे. अलीकडेच, त्याने आपल्या दुकानाजवळ वडापाव, समोसे आणि जिलेबी विकणारे एक नवीन काउंटर उघडले आहे.