नवी दिल्ली: केंद्र सरकारने शेतकऱ्यांसाठी सुरु केल्या पंतप्रधान शेतकरी सन्मान निधी योजनेचे ( PM Kisan samman nidhi scheme) दहाव्या हप्त्याचे पैसे कधी मिळणार, याची सर्वजण वाट पाहत आहेत. केंद्र सरकार येत्या काही दिवसांतच हे पैसे शेतकऱ्यांच्या खात्यात जमा करेल, असे सांगितले जात आहे. मात्र, कागदपत्रांमधील त्रुटींमुळे शेतकरी या लाभापासून वंचित राहू शकतात.
कागदपत्रांमध्ये काही त्रुटी असल्यास pmkisan.gov.in या संकेतस्थळाला भेट द्यावी लागेल. यानंतर, येथे तुम्हाला वरच्या बाजूला लिंक फॉर्मर्स कॉर्नर दिसेल. जर तुम्ही या लिंकवर क्लिक केले तर आधार एडिटची लिंक दिसेल, जिथे तुम्हाला क्लिक करावे लागेल. याठिकाणी योग्य माहिती भरून अपडेट करावे.
1. शेतकऱ्यांना त्यांचे नावं इंग्रजीत लिहिणे आवश्यक आहे. जर तुम्ही हिंदीत नाव लिहिले असेल तर ते सुधारणे आवश्यक आहे.
2. अर्ज करताना शेतकऱ्याच्या नावात आणि नावाच्या स्पेलिंगमध्ये कोणतीही चूक नसावी.
3. बँकेचा IFSC कोड लिहिताना कोणतीही चूक होऊ नये.
4. बँक खात्याचा क्रमांक लिहताना कोणतीही चूक होऊ नये.
5. तुमचा पत्ता नीट तपासा. जेणेकरून गावाचे स्पेलिंग लिहिण्यात चूक होणार नाही. या सर्व चुका आधारद्वारे दुरुस्त करा. कोणत्याही प्रकारची चूक झाल्यास तुमचे पैसे अडकतील.
गेल्या काही काळात काही बोगस शेतकऱ्यांनीही या योजनेतील पैसे लाटल्याची बाब समोर आली होती. त्यानंतर केंद्र सरकारने शेतकऱ्यांची पडताळणी सुरु केली होती. या तपासणीदरम्यान अपात्र असूनही योजनेते पैसे लाटणाऱ्यांकडून ते पुन्हा वसूल केले जात आहेत.
उत्तर प्रदेशातील बरेलीत 55,243 अपात्र शेतकरी पंतप्रधान शेतकरी सन्मान निधी योजनेचे पैसे लाटत असल्याचा प्रकार समोर आला होता. त्यामुळे आता या शेतकऱ्यांच्या खात्यात पैसे पाठवले जाणार नाहीत. सप्टेंबर महिन्यात जिल्हा स्तरावर तपास करण्यात आला. ज्यामध्ये ही फसवणूक उघडकीस आली. या प्रकरणात अपात्रांना जिल्हा कृषी विभागाच्या वतीने वसुली नोटीसा दिल्या जात आहेत. वसुलीनंतर हा पैसा सरकारच्या तिजोरीत जमा होईल.
पंतप्रधान नरेंद्र मोदी यांनी 2019 च्या लोकसभा निवडणुकीपूर्वी पीएम किसान सन्मान योजना जाहीर केली होती. 2019 च्या लोकसभा निवडणुकीत ही योजना गेमचेंजर ठरली होती. तेव्हापासून शेतकऱ्यांच्या खात्यात 8 हप्त्यांमध्ये पीएम किसान योजनेची रक्कम शेतकऱ्यांच्या खात्यात वर्ग करण्यात आली आहे. योजनेचा नववा हप्ता आज जारी होत आहे.