Share Market : गुंतवणुकीच्या या गर्तेत अडकू नका..शेअर बाजारात Pump And Dump चा धंदा तेजीत
Share Market : शेअर बाजारात जशी भरमसाठ कमाई होते, तसेच फसवणुकीचे अनेक सापळेही आहेत..तेव्हा सावध रहा..
नवी दिल्ली : शेअर बाजारात (Stock Market) कमाईची कोणतीच मर्यादा नाही. पण त्यासाठी या बाजाराचा सखोल अभ्यास असणे आवश्यक आहे. नाहीतर फसवणुकीचे अनेक सापळे (Many traps of deception) तुमच्या कष्टाचा पैसा अलगद संपून टाकतील. तेव्हा सावध रहा, सावज होऊ नका..
स्टॉक मार्केटमध्ये गुंतवणूक करणारा प्रत्येक जणाला बाजाराचा नाळ काही माहिती नसते. या कारणामुळे अनेक गुंतवणूकदार शेअर खरेदी आणि विक्री करताना तज्ज्ञांचा, विविध अॅपचा वापर करतात.
काही लोकं नेमकं याचाच फायदा उचलतात. ते गुंतवणूकदार सल्लागार होऊन, सल्ला देत, तुम्हाला गार करतात. हे सल्लागार सावज हेरुन त्यांना मोठी गुंतवणूक करायला लावतात आणि त्यामाध्यमातून त्यांचा फायदा करुन घेतात.
हे सल्लागार, तज्ज्ञ अगोदरच एखादा शेअर खरेदी करुन ठेवतात. त्यामध्ये लोकांना गुंतवणूक करायला लावतात. त्यामुळे शेअर बाजारात हा शेअर तेजीत येतो आणि त्याची किंमत वाढते.
शेअरचा बाजारातील भाव वधरला की, तज्ज्ञ त्याचे शेअर विकून मालामाल होतो. या प्रॅक्टिसला, फसवणुकीला पम्प आणि डम्प (Pump and Dump) घोटाळा म्हणतात. हा प्रकार अनेक वर्षांपासून सुरु आहे. तेव्हा वेळीच सावध व्हा.
आजही पम्प आणि डम्पचा प्रकार सर्रास सुरु आहे. टेलिग्राम, युट्यूब, व्हॉट्सअप यासारख्या प्लॅटफॉर्मवर शेअर बाजाराच्या ग्रुपचा सुळसुळाट आला आहे. टिप्सच्या नावाखाली, फुकट सल्ला देण्याच्या आडून ते त्यांची पोळी भाजून घेत आहेत.
जानेवारी 2022 मध्ये सेबीने (SEBI) टेलिग्रामवरील ‘बुल रन’ चॅनेलवर थेट कारवाई केली होती. हे चॅनल 6 लोक चालवित होते. ते अगोदर शेअर खरेदी करायचे आणि इतरांना गुंतवणुकीसाठी उद्युक्त करायचे.
शेअर बाजारातील या शेअर बाबत हा ग्रुप हवा करत असे. त्या कंपनीविषयी वरचढ माहिती द्यायचे. त्यानंतर शेअरचा भाव वधरला की, ते विकून टाकायचे. या 6 लोकांनी या पद्धतीने लोकांना चुना लावत 2.84 कोटी रुपयांची अवैध कमाई केली.
त्यामुळे बाजारात एका दिवसात कोणीच श्रीमंत होत नाही, हे लक्षात ठेवा. कोणत्याही बातमीच्या, सल्ल्याच्या आधारे लागलीच शेअरची विक्री अथवा खरेदी करु नका. बाजाराविषयीचा, कंपनी विषयीचा तुमचा अभ्यास वाढवा.
