Tirupati Temple : व्यंकटरमणा गोविंदा! बालाजी चरणी 2900 किलो सोन्याचे दान..

तिरुपती संस्थानची जोरदार संपत्ती

Image Credit source: सोशल मीडिया

नवी दिल्ली : जगातील श्रीमंत देवस्थान तिरुमाला तिरुपती देवस्थानमने (TTD) संपत्ती जाहीर केली. भाविकांनी कोरोना (Corona Virus) काळातही देवस्थानला भरभरुन दान (Charity) केल्याचे यामध्ये उघड झाले. या संपत्तीची आकडेवारी डोळे दिपवणारी आहे. देणगीत जराही कमी आलेली नाही, उलट देणगीत वाढ झाली आहे.

गेल्या तीन वर्षांत तिरुपती मंदिरात (Tirupati Temple) जवळपास 2,900 किलोग्रॅम सोन्याचे दान करण्यात आले. देवस्थान ट्रस्टने शनिवारी मुदत ठेवी आणि गोल्ड डिपॉजिट्सची संपत्ती जाहीर केली.

आकडेवारीनुसार, तिरुपती मंदिराकडे जवळपास 10.3 टन सोने आणि 15,938 कोटी रुपयांचे भंडार आहे. निधीचा ओघ सुरुच आहे. त्यामुळे सध्याच्या ट्रस्ट बोर्डाने 2019 नंतर गुंतवणूक करण्यावर भर दिला आहे.

टाईम्स ऑफ इंडियाच्या अहवालानुसार, मंदिर ट्रस्टचे स्वर्ण भांडार 2019 साली, 7339.4 टन होता. पण आता हे भंडार 10.3 टनाचे झाले. गेल्या 3 वर्षांत जवळपास 2.9 टन (2,900 किलोग्राम) सोन्याची वृद्धी झाली.

हे सोने सरकारी बँकांमध्ये गोल्ड डिपॉजिटच्या रुपाने जमा आहे. या सोन्याचा बाजारभाव सर्वांनाच थक्क करणारा आहे. या 10.3 टनाचे बाजार मूल्य खूप मोठे आहे. सध्याच्या दरानुसार,त्याची 5,300 कोटी रुपयांपेक्षा जास्त किंमत आहे.

मंदिराचे एकूण भांडवल गेल्या तीन वर्षांत 2.26 लाख कोटी रुपय झाले आहे. TTD चे अधिकारी एवी धर्म रेड्डी (AV Dharma Reddy) यांनी याविषयीची माहिती दिली. 2019 मध्ये अनेक बँकांचे मिळून मुदत ठेवीत 13,025 कोटी रुपयांची गुंतवणूक केली आहे.

दरवर्षी या रक्कमेत वाढ होत आहे. यंदा ही रक्कम वाढून 15,938 कोटी रुपये मुदत ठेवीत ठेवण्यात आले आहे. संस्थानच्या गुंतवणूकीत जवळपास 2,900 कोटी रुपयांची वाढ झाली आहे.

अहवालानुसार, मंदिराच्या मालकीच्या संपूर्ण देशात 960 मालमत्ता आहेत. या मालमत्ता 7,123 एकरवर आहेत. मंदिराच्या उत्पन्नाचा प्रमुख स्त्रोत दान आहे. भाविक, व्यापारी आणि अनेक संस्था दररोज दानधर्म करतात.