मेडिकलमध्ये चालला होता तरुण, वाटेत मित्रांचे कुणासोबत भांडण सुरु होते; मध्यस्थी करायला गेला अन्…

डोंबिवली / सुनील जाधव : मित्रांचे भांडण सोडवायला जाणे एका तरुणाला चांगलेच महागात पडले आहे. भांडण सोडवायला आलेल्या 29 वर्षीय तरुणावरच जीवघेणा हल्ला केल्याची घटना डोंबिवलीत घडली आहे. डोंबिवली मानपाडा रोडवरील गावदेवी मंदिर परिसरात ही घटना घडली. विजय आवटे असे मारहाण झालेल्या तरुणाचे नाव असून, यात तो गंभीर जखमी झाला आहे. याप्रकरणी टिळकनगर पोलिसात गुन्हा दाखल करण्यात आला आहे. पोलिसांनी हल्ला करणाऱ्या दोन तरुणांना बेड्या ठोकल्या आहेत. इतर आरोपी फरार असून पोलीस त्यांचा शोध घेत आहेत.

मेडिकलमध्ये चालला होता तरुण

डोंबिवली पूर्वेत राहणारा विजय आवटे हा शनिवारी मध्यरात्रीच्या सुमारास मानपाडा रोडवरील गावदेवी मंदिर जवळील मेडिकलमध्ये गोळी आणण्यासाठी गेला होता. यादरम्यान त्याठिकाणी त्याने त्याच्या सुयोग आणि सचिन नावाच्या मित्रांचे काही लोकांबरोबर भांडण सुरू असल्याचे त्याच्या निदर्शनास आले. विजयने त्या ठिकाणी जाऊन मध्यस्थी करत मित्रांचे भांडण सोडवण्याचा प्रयत्न सुरू केला.

मध्यस्थी करायला गेला म्हणून हल्ला

याचाच राग मनात धरून विजयला एका टोळीतील 5 तरुणांनी मिळून धमकी देत लाथा-बुक्यांनी मारहाण केली. यानंतक विजयवर चाकूने सपासप वार केले. या मारहाणीत विजय हा गंभीर जखमी झाला आहे. विजयवर एका खाजगी रुग्णालयात उपचार सुरू आहेत. दरम्यान, याप्रकरणी डोंबिवली टिळकनगर पोलीस ठाण्यात पाच आरोपींच्या विरोधात गुन्हा दाखल करण्यात आला आहे. यात दोन तरुणांना पोलिसांनी अटक केली आहे. तर यात तीन आरोपी अजूनही फरार असून, पोलीस त्यांचा शोध घेत आहेत.