दारुच्या नशेत बहिण आणि आईवडिलांना शिवीगाळ करायचा, अखेर मेव्हण्याला संताप अनावर झाला !

सुनील जाधव, TV9 मराठी, डोंबिवली : दारुच्या नशेत बहिण आणि आई-वडिलांना शिवीगाळ करायचा म्हणून मेव्हण्याने भावोजीची हत्या केल्याची धक्कादायक घटना घडली आहे. डोंबिवलीच्या खांबलपाडा परिसरात ही घटना घडली आहे. मारीकली तेवर असे मयत व्यक्तीचे नाव असून, रमेश तेवर असे हत्या करणाऱ्या मेव्हण्याचे नाव आहे. याप्रकरणी डोंबिवली टिळक नगर पोलिसात हत्येचा गुन्हा दाखल करण्यात आला आहे. घटनेनंतर आरोपी फरार झाला असून, पोलीस त्याचा शोध घेत आहेत. मात्र या घटनेने डोंबिवली परिसरात मोठी खळबळ उडाली आहे.

मयताला दारुचे व्यसन होते

डोंबिवली खांबलपाडा परिसरामध्ये मयत मारीकली तेवर हा पत्नी, तीन मेहुणे आणि सासू सासरे यांच्यासोबत राहत होता. मारीकली आणि त्याचे तिन्ही मेहुणे इडली विकायचे काम करतात. मारीकली याला दारू प्यायचे व्यसन होते. दारू प्यायल्यानंतर तो नेहमी सासू सासरे आणि बायको यांना शिवीगाळ करायचा. त्याच्या स्वभावामुळे सर्व वैतागले होते. नेहमीप्रमाणे आज दुपारी तो दारू पिऊन आला. घरामध्ये पुन्हा शिवीगाळ सुरू केली.

शिवीगाळला कंटाळून मेव्हण्याने भावोजीला संपवले

आपल्यासमोर आपल्या आई-वडिलांना आणि बहिणीला शिवीगाळ करत असल्याने मारीकरी याच्या मोठ्या मेव्हण्याने त्याला शांत करत समजवण्याचा प्रयत्न केला. मात्र तरीही मारीकरी याची शिवीगाळ थांबवत नसल्याने अखेर संतपलेल्या धाकट्या मेव्हण्याने त्याच्यावर चाकूने हल्ला करत घटनास्थळावरून पळ काढला.

यानंतर जखमी अवस्थेत मारीकरी याला मोठ्या मेव्हण्याने आणि त्याच्या पत्नीने उपचारासाठी खाजगी रुग्णालयात नेले. मात्र रक्तप्रवाह जास्त झाल्याने त्याचा मृत्यू झाला. सध्या या प्रकरणी टिळक नगर पोलीस ठाण्यात मेहुणा रमेश वेलास्वामी तेवर याच्या विरोधात हत्येचा गुन्हा दाखल झाला आहे. पोलीस त्याचा शोध घेत आहेत.