वेब सीरिजमध्ये रोल देतो सांगून अभिनेत्रीला ड्रग्ज प्रकरणात अडकवलं; आरोपीला जामीन मंजूर
उच्च न्यायालयात दाखल केलेल्या जामीन अर्जात पॉलचे वकील अरुणा पै आणि अयाज खान आणि बोभाटेचा वकील शैलेख खरात यांनी सांगितलं की, ट्रॉफीतून जप्त करण्यात आलेल्या गांजाचं प्रमाण अत्यल्प असल्याने या दोघांना जास्तीत जास्त तीन वर्षांचा तुरुंगवास भोगावा लागेल. त्यापैकी दीड वर्षे त्यांनी तुरुंगवास भोगला असून खटला अजून सुरू होणं बाकीच आहे.
अभिनेत्री क्रिसन परेरावर ड्रग्ज केसमध्ये अडकवण्याच्या आरोपाखाली तुरुंगात असलेल्या मुंबईतील बेकरला उच्च न्यायालयाने मंगळवारी जामीन मंजूर केला. याप्रकरणी क्रिसनला गेल्या वर्षी शारजाहमध्ये अटक करण्यात आली होती. अँथनी पॉल नावाच्या बेकरला गेल्या वर्षी मुंबईत अटक करण्यात आली होती. जवळपास दीड वर्षापासून तो तुरुंगात होता. याप्रकरणातील सहआरोपी राजेश बोभाटे यालाही मुंबई उच्च न्यायालयाने जामीन मंजूर केला आहे. प्रकरणातील ड्रग्जचं प्रमाण कमी असल्याने आणि त्यांना तुरुंगात ठेवून कोणताही हेतू साध्य होणार नसल्याचं निरीक्षण नोंदवत न्यायालयाने जामीन मंजूर केला.
“सध्याच्या प्रकरणात आरोपपत्र आधीच दाखल झाले आहेत. आरोपींनी एक वर्ष पाच महिने तुरुंगवास भोगला आहे. रेकॉर्डवर असलेल्या साहित्यानुसार, गांजाचा कमी प्रमाणात समावेश होता. अशा स्थितीत आरोपींची कोठडी सुरू ठेवून कोणताही हेतू साध्य होणार नाही. त्यामुळे जामिनावर अर्जदारांची मुदत वाढवून देण्याचा खटला चालवला जातो”, असं न्यायमूर्ती मनीष पितळे यांनी आदेशात म्हटलंय.
क्रिसन परेरा ही मुंबईत राहणारी अभिनेत्री असून मार्च 2023 मध्ये एका व्यक्तीने तिच्याशी संपर्क साधला होता. रवी असं आपलं नाव सांगून त्याने तिला एका वेब सीरिजच्या भूमिकेची ऑफर दिली होती. या भूमिकेच्या ऑडिशनसाठी तिला युएईला जाण्याची विनंती करण्यात आली होती. त्यानुसार 1 एप्रिल रोजी परेरा शारजाहला गेली. प्रवास सुरू होण्यापूर्वी त्या व्यक्तीने क्रिसनला एक ट्रॉफी दिली होती. या ट्रॉफीमध्ये ड्रग्ज लपवण्यात आलं होतं. ती ट्रॉफी युएईमध्ये एका व्यक्तीला देण्यासाठी क्रिसनला सांगण्यात आलं होतं. मात्र शारजाहमध्ये गेल्यानंतर तिला अटक करण्यात आली. भारतीय अधिकाऱ्यांकडून तिची चौकशी होण्यापूर्वी तिने जवळपास तिथे महिनाभर तुरुंगात घालवला होता. नंतर समजलं की पॉलने तिच्या आईशी पूर्वी झालेल्या क्षुल्लक वादाचा सूड म्हणून तिला ड्रग्जच्या आरोपात अडकवलं होतं.
ऑक्टोबर 2023 मध्ये विशेष न्यायालयाने पॉलचा जामीन नाकारला होता. क्रिसन परेराने अनुभवलेला धक्का आणि मुंबई पोलिसांनी दिलेली माहिती लक्षात घेऊन न्यायालयाने हा जामीन नाकारला होता. पोलिसांनी असं सांगितलं होतं की पॉलने क्रिसनप्रमाणेच इतरही चार जणांना अशा प्रकरणांमध्ये अडकवलंय. यात क्लेटन रॉड्रिग्ज नावाच्या डीजेचाही समावेश होता. त्याच्याजवळ ड्रग्जचा केक आढळल्यानंतर शारजाहमध्ये त्याला 25 वर्षांची शिक्षा सुनावण्यात आली होती. एका महिन्यानंतर कोर्टाने या प्रकरणातून कठोर आरोप काढून टाकले होते.
