रुम नंबर 404 आणि जीवघेणी साडी… बिल्डरचा टोकाचा निर्णय; ऑफिसच का निवडलं?

मध्यप्रदेशातील इंदूरच्या पलासिया पोलीस ठाणे क्षेत्रात बिल्डर संदीप ऊर्फ बंटी नागर यांनी आपल्या कार्यालयातच आयुष्य संपवलं आहे. या प्रकरणाचा पोलिसांनी तपास सुरू केला आहे. ऑफिसच्या रुम नंबर 404मध्ये त्यांनी गळफास लावून स्वत:ला संपवलं. पोलिसांना प्राथमिक चौकशीत या मागचं काही कारण सापडलेलं नाही. त्यामुळे पोलीस प्रत्येक अँगलने या प्रकरणाचा तपास करत आहेत. कौटुंबिक वाद, व्यावसायिक स्पर्धा आणि ब्लॅकमेलिंग आदी तीन अँगलने पोलिसांनी तपास सुरू केला आहे.

पोलिसांसमोरचा सर्वात मोठा प्रश्न म्हणजे जीवन संपवण्यासाठी संदीप नागर यांनी ऑफिसचीच निवड का केली? ते नेहमी या ऑफिसातील रुम नंबर 404 मध्ये एकटे बसायचे. घटना घडली त्या दिवशीही ते ऑफिसात आले होते. काही काळ ऑफिसमध्ये बसल्यानंतर त्यांनी टोकाचा निर्णय घेतला.

या रुमशी संबंधित काही खास कारण होतं का? ज्यामुळे नागर यांनी आयुष्य संपवण्यासाठी हा रुम निवडला. किंवा या रुममध्ये कोणी येऊ शकत नसल्याने एकांत मिळू शकेल या हिशोबाने त्यांनी हा रूम निवडला का? आदी गोष्टींचा पोलीस तपास करत आहेत. त्यासाठी नागर यांचे कुटुंबीय आणि मित्र परिवार तसेच ऑफिस स्टाफचीही चौकशी करण्यात येणार आहे.

तीन दिवसापूर्वी आणली साडी

पोलिसांच्या प्राथमिक तपासात असंख्य गोष्टी समोर आल्या आहेत. संदीप नागर यांनी गळफास घेण्यासाठी पत्नीची साडी वापरली होती. विशेष म्हणजे त्यांनी तीन दिवसांपूर्वीच ही साडी पत्नीसाठी आणली होती. नवीनच साडी होती. त्यांनी ही साडी ऑफिसमध्ये आणून ठेवली होती. त्यामुळे त्यांनी जीवन संपवण्याचा आधीच प्लान केला होता का? असा सवाल या निमित्ताने केला जात आहे.

साडी ऑफिसात आणण्याचं कारण काय होतं? याचा पोलीस शोध घेत आहेत. या काळात त्यांच्या स्वभावात काही बदल झाला होता का? याचाही शोध घेतला जात आहे. घटना घडली तेव्हा ऑफिसात कोणीच नव्हते. त्याची संधी साधूनच त्यांनी जीवन संपवल्याचं सांगितलं जात आहे.

कौटुंबीक वाद होता?

सुरूवातीच्या चौकशीत कौटुंबीक कारणही समोर आलं आहे. संदीप नागर यांच्या कुटुंबात वाद सुरू असावा, असा पोलिसांना संशय आहे. मात्र, चौकशी झाल्यावरच याबाबतची पुष्टी होणार आहे. त्यामुळेच पोलीस नागर यांच्या कुटुंबातील लोकांशी आणि त्यांच्या मित्र परिवारांची चौकशी करून अधिक माहिती मिळवण्याचा प्रयत्न करत आहेत.

याशिवाय व्यावसायिक स्पर्धेच्या अँगलकडेही पोलिसांचं लक्ष आहे. इंदौरमध्ये गेल्या काही महिन्यांपासून मालमत्तेच्या व्यवहारात बऱ्याच घटना घडल्या आहेत. बाहेरच्या मोठ्या कंपन्या येऊन शहरात गुंतवणूक करत आहेत. त्यामुळे व्यवसायाशी संबंधित तणाव येण्याची शक्यता आहे. नागर यांच्यावर व्यावसायिक दबाव होता का? याचा शोधही पोलीस घेत आहेत. त्यासाठी नागर यांच्या मित्रांची चौकशी करण्यात येणार आहे.

मोबाईलमधून रहस्य उलगडणार?

चौकशीचा तिसरा प्रमुख अँगल ब्लॅकमेलिंगशी संबंधित आहे. पोलिसांनी संदीप नागर यांचा मोबाइल जप्त केला आहे. गेल्या एक महिन्यापासूनची कॉल डिटेल काढून त्याचा तपास करण्यात येणार आहे. नागर यांनी कोणत्या लोकांना या काळात संपर्क केला होता. एखाद्या व्यक्तीशी संदिग्ध चर्चा होत होती का? याचाही पोलीस तपास करत आहेत. रुम नंबर 404, तीन दिवसांपूर्वी ऑफिसात आणलेली साडी, व्यावासायिक स्पर्धा, कौटुंबीक वाद आणि मोबाइलवरील संभाषण आदी गोष्टींचं एकत्रिकरण करून पोलीस या घटनेच्या मूळाशी जात आहेत.