पार्किंगच्या वादातून वकिलासह आईला मारहाण, हायप्रोफाईल सोसायटीतील धक्कादायक प्रकार

डोंबिवली : कल्याण-शीळ मार्गावर हायप्रोफाईन सोसायटीत एक धक्कादायक घटना घडली आहे. वाहन पार्किंगवरुन झालेल्या वादातून तिघा जणांनी वकिलासह त्याच्या आईला बेदम मारहाण केली. मारहाणीनंतर आरोपी पळून गेले. याप्रकरणी मानपाडा पोलीस ठाण्यात गुन्हा नोंद करण्यात आला आहे. शरद मनारी असे मारहाण झालेल्या आरोपीचे नाव आहे. तर सागर पाटील, अरविंद पाटील अशी आरोपींपैकी दोघांची नावे आहेत. कल्याण-शीळ मार्गावरील पलावा वसाहतीत ही घटना घडली.

गाडी चुकीची उभी केल्याने जाब विचारला

पलावा वसाहतीतील व्हिएनतो इमारतीत वकील शरद मनारी राहतात. त्यांनी आपल्या इमारतीखाली आपली गाडी उभी केली होती. या गाडीच्या मागे आरोपी सागर पाटीलने गाडी लावली होती. यामुळे मनारी यांना त्यांची गाडी काढता येत नव्हती. यावरुन मनारी यांनी पाटील याला वाहन असे का उभे केले विचारले. मनारी यांच्या बोलण्याचा पाटील याला राग आला. सागर पाटील, त्याचा भाऊ अरविंद आणि अन्य एका इसमाने मनारी यांना लाथा-बुक्क्यांनी मारहाण केली. तसेच आम्ही गाववाले आहोत तुला बघून घेतो, अशी धमकीही दिली.

मुलाला सोडवायला आलेल्या आईलाही मारहाण

मुलाला मारहाण होताना पाहून मनारी यांची आई सोडवायला मध्ये पडली. आरोपींनी तिलाही जमिनीवर पाडून मारहाण केली. यानंतर एका आरोपीने मनारी यांच्या पाठीत चाकूने वार केले. मनारी यांना जखमी करुन आरोपींनी तेथून पळ काढला. यानंतर मनारी यांनी मानपाडा पोलीस ठाण्यात गुन्हा दाखल केला आहे. पोलीस फरार आरोपींचा शोध घेत आहेत. याप्रकरणी पुढील तपास पीएसआय जी.एस. मुसळे करत आहेत.