फिरायला गेलेल्या विद्यार्थिनीवर तीन मित्रांकडूनच गँगरेप, अश्लील व्हिडीओ बनवल्याचाही दावा

विद्यार्थिनीवर सामूहिक बलात्कार

भोपाळ : मध्य प्रदेशातील इंदौरमध्ये एका विद्यार्थिनीवर सामूहिक बलात्कार झाल्याची धक्कादायक घटना उघडकीस आली आहे. अंमली पदार्थ देऊन तिघा मित्रांनीच तिच्यावर गँगरेप केल्याचा आरोप आहे. पीडितेच्या मैत्रिणीसह चौघांवर गुन्हा दाखल करण्यात आला असून आरोपी फरार आहेत.

नेमकं काय घडलं?

23 ऑगस्ट रोजी मध्य प्रदेशातील इंदौरमध्ये ही घटना घडल्याची माहिती पोलिसांनी दिली आहे. एका खासगी महाविद्यालयात प्रथम वर्षाचं शिक्षण घेणारी विद्यार्थिनी आपली मैत्रीण आणि तीन तरुणांसह मांडव भागात फिरायला गेली होती. रात्री घरी येताना तिला एका तरुणाने कोल्डड्रिंकमधून अंमली पदार्थ घालून दिला. ती बेशुद्ध झाल्यानंतर तिघे आरोपी तिला एका फ्लॅटमध्ये घेऊन गेले. तिथे त्यांनी आळीपाळीने तिच्यावर सामूहिक बलात्कार केल्याचा आरोप आहे.

अश्लील फोटो-व्हिडीओ काढल्याचा आरोप

पीडित विद्यार्थिनीने लसुडिया पोलीस स्थानकात आरोपींविरोधात तक्रार दाखल केली आहे. पोलिसांनी पीडितेच्या मैत्रिणीसह अन्य तिघा मित्रांवर गुन्हा दाखल केला असून त्यांचा शोध सुरु आहे. आरोपी आशिष, निकुल आणि हितेश यांनी आपला अश्लील फोटो आणि व्हिडीओ काढल्याचा आरोपही तिने केला आहे.

बीडमध्ये विवाहितेवर बलात्कार

दुसरीकडे, महाराष्ट्रीतील बीड जिल्ह्यात महिलांवरील अत्याचाराच्या घटना वारंवार समोर येत आहेत. 28 वर्षीय विवाहितेवर बलात्कार झाल्याची घटना ऐन रक्षाबंधनच्या दिवशी समोर आली होती. सोशल मीडियावर फोटो अपलोड करण्याची धमकी देत नात्यातील व्यक्तीनेच महिलेवर बलात्कार केल्याचा आरोप झाला.

जालन्यात अल्पवयीन मुलीवर बलात्कार

दरम्यान, जालना जिल्ह्यातील बदनापुर तालुक्यातील कंडारी खुर्द येथे अल्पवयीन मुलीवर बलात्कार झाल्याची घटनाही नुकतीच समोर आली होती. मुलगी एकटी असल्याचे लक्षात येताच आरोपी सोपान ढाकणे आणि शंभु ढाकणे या दोघांनी मुलीला निर्जन स्थळी नेले. तिथे तिला जीवे मारण्याची धमकी देत तिच्यावर बलात्कार केला. त्यानंतर या घटनेबद्दल कुणाला सांगू नको, म्हणून पुन्हा धमकी दिल्याचा आरोप आहे.

संबंधित बातम्या :

जीवे मारण्याची धमकी, जालन्यात अल्पवयीन मुलीवर बलात्कार, एकाला अटक

बीडमध्ये 28 वर्षीय विवाहितेवर बलात्कार, सोशल मीडियावर फोटो अपलोड करण्याची धमकी