पुणे शहरात कोयता गँगची दहशत, दुकानात घुसून व्यापाऱ्यावर केला हल्ला

रणजित जाधव, पिंपरी चिंचवड : पुणे शहर अन् परिसरात कोयता गँगचा बिमोड करण्यासाठी पोलिसांकडून मोठ्या प्रमाणावर उपाययोजना सुरु आहेत. कोयात गँगचा म्होरक्याला अटक केली गेली आहे. काही गुन्हेगारांवर मकोकाची कारवाई करण्यात आली आहे. काही जणांना हद्दपार करण्यात आले आहे. कोयताची विक्री करताना आधारकार्डची सक्ती करण्यात आली आहे. कोम्बिंग ऑपरेशननंतर गुन्हेगार मोकाट असल्याचे स्पष्ट आहे. कारण रविवारी पिंपरी चिंचवडमध्ये कोयता गँगने चांगलीच दहशत निर्माण केली.

कोयता गँगचा हल्ला

पिंपरी चिंचवडमध्ये कोयता गँगची दहशत निर्माण झाली आहे. दुकानात घुसून व्यापाऱ्यावर हल्ला करण्यात आला आहे. हा हल्ला कोयता गँगने केला आहे. तसेच दुकानासह परिसरातील वाहनांची तोडफोड केली आहे. या प्रकारात व्यापारी जखमी झाला आहे. ही घटना सीसीटीव्हीत कैद झाली आहे. यामुळे परिसरात दहशतीचे वातावरण पसरले आहे. आता चिखली पोलिसांकडून समाजकंटकाचा शोध सुरू करण्यात आला आहे.

आयुक्त रस्त्यावर

पुणे शहर अन् परिसरातील गुन्हेगारी मोडीत काढण्यासाठी पोलीस आयुक्त, उपायुक्त रस्त्यावर उतरले आहेत. पुणे परिसरात ‘कोम्बिंग’ ऑपरेशन राबवण्यात आले. या ऑपरेशनमुळे अनेक गुन्हेगारांना अटक झाली. काहींना नोटीस देण्यात आली. सराईत गुन्हेगारांवर प्रतिबंधात्मक कारवाई केली गेली. पुणे पोलीस आयुक्त रितेशकुमार यांनी शुक्रवारी मध्यरात्री शहरातील अनेक पोलिस ठाण्यांना भेटी दिल्या. त्यानंतर पोलीस अधिकारीही दक्ष झाले. परंतु कोयता गँगची दहशत कमी होत नाही.

पुणे शहरात रस्त्यावर सदाशिव पेठेत एका तरुणीवर कोयत्याने हल्ला झाला होता. प्रेम प्रकरणावरुन पेरुगेट पोलीस चौकीजवळ हा हल्ला झाला. त्यानंतर पोलीस चांगलेच आक्रमक झाले. अनेक गुन्हेगारांवर कारवाई झाली. दुसऱ्या बाजूला पोलीस आयुक्तांनी काही अधिकारी अन् कर्मचाऱ्यांचे निलंबनसुद्धा केले.