खोपोलीत गगनगिरी आश्रमात चाललेल्या शाळेच्या बसचा अचानक ब्रेक फेल झाला, केवळ दैव बलवत्तर म्हणून…
बसमध्ये एकूण 64 विद्यार्थी आणि 6 शिक्षक होते. जुन्या पुणे-मुंबई हायवेवरून गगनगिरी आश्रम खोपोली येथे जात असताना शिंग्रोबा मंदिराच्या पाठीमागील घाटामध्ये त्यांच्या बसचा ब्रेक फेल झाला.
खोपोली : एकविरा दर्शन आटोपून गगनगिरी आश्रमात दर्शनासाठी चाललेल्या शाळेच्या बसचा जुन्या मुंबई-पुणे घाटात ब्रेक फेल झाल्याने बस झाडावर आदळून अपघात झाल्याची घटना आज घडली आहे. केवळ दैव बलवत्तर म्हणून बस दरीत कोसळता कोसळता वाचली. सुदैवाने बसमधील सर्व विद्यार्थी आणि शिक्षक सुखरुप आहेत. सर्व विद्यार्थ्यांना दुसऱ्या बसची व्यवस्था करुन रवाना करण्यात आले. यानंतर अपघातग्रस्त बसला बाजूला करुन वाहतूक सुरळीत करण्यात आली.
डोंबिवलीतील शाळेची होती बस
डोंबिवली कोपर येथील च.रू. बामा म्हात्रे विद्यामंदिर या शाळेतील इयत्ता तिसरी ते सातवीच्या विद्यार्थ्यांची सहल गेली होती. लोणावळ्यात एकविरा देवीचे आटोपून ही बस खोपोलीतील गगनगिरी आश्रमात दर्शनासाठी चालली होती.
बसमध्ये 64 विद्यार्थी होते
बसमध्ये एकूण 64 विद्यार्थी आणि 6 शिक्षक होते. जुन्या पुणे-मुंबई हायवेवरून गगनगिरी आश्रम खोपोली येथे जात असताना शिंग्रोबा मंदिराच्या पाठीमागील घाटामध्ये त्यांच्या बसचा ब्रेक फेल झाला. यामुळे बस झाडाला धडकून अपघात झाला.
सुदैवाने अपघातात कुणीही जखमी नाही
मात्र सुदैवाने या अपघातामध्ये कोणीही जखमी झाले नाही. बसमधील सर्व विद्यार्थी आणि शिक्षक सुखरुप आहेत. वेळ आली होती पण काळ आला नव्हता, म्हणूनच बस दरीत जाता जाता वाचली. अन्यथा मोठी दुर्घटना घडली असती.
