रात्रीच्या वेळेस त्याने दार ठोकलं , मात्र मनात काही वेगळंच होतं, दार उघडताच दिसेल त्याच्यावर केला वार, तिहेरी हत्याकांडाने शिर्डी हादरली !

अहमदनगर | 21 सप्टेंबर 2023 : अहमदनगर जिल्ह्यातील शिर्डीजवळ एका धक्कादायक घटना घडली आहे. तिहेरी हत्याकांडाने (triple murder case)संपूर्ण जिल्हा हादरला आहे. यामध्ये दोन महिला व एका पुरूषाचा मृत्यू झाला आहे. मात्र ही हत्या कोणी केली हे समोर आल्यावर सर्वच हादरले. जावयानेच पत्नी, मेव्हणा यांची हत्या केली एवढेच नव्हे तर त्याने त्याच्या आजेसासूला देखील सोडलं नाही व त्यांचाही जीव घेतला. या खळबळनक घटनेमुळे गावात दहशतीचं वातावरण पसरलं असून संपूर्ण जिल्हा हादरला आहे.

काल रात्रीच्या उशीराच्या सुमारास हा प्रकार घडला. कौटुंबिक वादामुळे तिघांना जीव गमवावा लागला आहे. तर या हल्ल्यात आणखी तिघेही जखमी झाले असून त्यांची प्रकृती गंभीर असल्याचे समजते. या हत्याकांडानंतर पोलिसांनी सुरेश निकम आणि त्याचा चुलत भाऊ रोशन निकम या दोघांना ताब्यात घेतल्याची माहिती समोर आली आहे.

तिथे नेमकं काय घडलं ?

पोलिसांनी दिलेल्या माहितीनुसार, कौटुंबिक वादातू हे धक्कादायक हत्याकांड घडले आहे. अहमदनगर जिल्ह्यातील शिर्डीजवळ असलेल्या सावळीविहीर गावात हा रक्तपात घडला. रात्री ११ च्या सुमारास घरात आलेल्या जावयाने पत्नी, मेव्हणा व आजेसासू यांच्यावर वार करून त्यांची हत्या केली. तर इतर तिघांवरही हल्ला केला. यामध्ये आरोपीची सासू, सासरे आणि मेव्हणी हे तिघेही गंभीर जखमी झाले. त्या तिघांवरही शिर्डी येथील साईबाबा हॉस्पिटलमध्ये उपचार सुरू आहेत.

आरोपी सुरेश निकम हा रात्री ११ च्या सुमारास त्याच्या सासरी गेला आणि दार वाजवू लागला. मात्र त्याच्या मनात काही वेगळंच शिजत होतं. दार उघडलं जाताच त्याने मागता पुढचा काहीही विचार न करता, समोर दिसेल त्या व्यक्तीवर धारदार शस्त्राने वार करण्यास सुरूवात केली. यामध्ये आरोपीची पत्नी वर्षा सुरेश निकम (वय २४), मेव्हणा रोहित गायकवाड (वय २५) आणि आजेसासू हिराबाई गायकवाड ( वय ७०) या तिघांचाही जीव गेला.

तर आरोपीचे सासरे चांगदेव गायकवाड (वय ५५), सासूबाई संगीता गायकवाड ( वय ४५) आणि त्या मेव्हणी योगिता जाधव (वय ३०) हे तिघेही जबर जखमी झाले. या हत्याकांडाप्रकरणी पोलीसांनी आरोपी सुरेश निकम याला नाशिक जिल्ह्यातून ताब्यात घेतले. तसेच त्याचा चुलत भाऊ देखील पोलिसांचा ताब्यात आहे. शिर्डी पोलिस ठाण्यात याप्रकरणी गुन्हा दाखल करण्यात आला असून घटनेचा पुढील तपास पोलीस करत आहेत.