नातीसमोरच सासऱ्याने सुनेचा काटा काढला, कारण ऐकून तुम्हीही हैराण व्हाल !
पुण्यातील खेडमध्ये नात्यांना काळिमा फासणारी घटना घडली आहे. सासऱ्याने सुनेसोबत जे केले ते पाहून सर्वांनाच धक्का बसला आहे.
पुणे : खेड तालुक्यात एक धक्कादायक घटना उघडकीस आली आहे. सासऱ्याच्या अनैतिक संबंधाला विरोध करत होती म्हणून सासऱ्याने सुनेचा काटा काढल्याची घटना खेड तालुक्यातील वाफगाव येथे घडली आहे. धक्कदायक म्हणजे नातीसमोरच सासऱ्याने हे कृत्य केले. मेघा रंगनाथ कोळी असे मृत झालेल्या सुनेचे नाव आहे. तर दिनकर कोळी असे नराधम सासऱ्याचे नाव आहे. या प्रकरणी दिनकर कोळी याच्यावर राजगुरुनगर पोलिसांत खुनाचा गुन्हा दाखल करण्यात आला आहे. या हत्येच्या घटनेने संपूर्ण खेड तालुक्यात एकच खळबळ उडाली आहे. सासऱ्याने केलेल्या कृत्याचा निषेध व्यक्त करण्यात येत आहे.
काय आहे प्रकरण?
आरोपी दिनकर कोळी याचे एका महिलेसोबत अनैतिक संबंध सुरु होते. मात्र हे संबंध दिनकर यांची सून मेघा हिला मान्य नव्हते. याबाबत तिने सासऱ्याला अनेकदा विरोधही केला होता. मात्र दिनकर ऐकत नव्हते. सासरा त्या महिलेकडे जात असताना सुनेने त्यांना हटकले. मात्र सासऱ्याला राग अनावर झाला आणि त्याने सुनेची हत्याच केली. ज्यावेळी हत्या केली त्यावेळी त्याची सात वर्षांची चिमुकली नात समोर होती. तिने पोलिस जबाबात ही माहिती दिली आहे.
राजगुरुनगर पोलिसांना घटनेची माहिती देण्यात आली. पोलिसांनी तात्काळ घटनास्थळी धाव घेत मृतदेह शवविच्छेदनासाठी रुग्णालयात पाठवला. या प्रकरणी दिनकर कोळी याच्यावर राजगुरुनगर पोलिसात हत्येचा गुन्हा दाखल करण्यात आला आहे. पोलिसांनी आरोपी सासऱ्याला अटक केली आहे. या घटनेमुळे कुटुंबीयांनाही धक्का बसला आहे. सासऱ्याच्या अनैतिक संबंधामुळे सात वर्षाची चिमुरडी आईच्या मायेला पोरकी झाली आहे.
