बॉलिवूडवर शोककळा! गजनी, लगान फेम अभिनेते प्रदीप रावत यांचे निधन
बॉलिवूडवर शोककळा पसरली आहे. 'लगान' आणि 'गजनी'सारख्या चित्रपटांमधील दमदार अभिनयाने प्रेक्षकांची मनं जिंकणारे ज्येष्ठ अभिनेते प्रदीप रावत यांचे निधन झाले आहे. वयाच्या 74व्या वर्षी त्यांनी अखेरचा श्वास घेतला.
बॉलिवूडवर शोककळा पसरली आहे. ‘लगान’ आणि ‘गजनी’सारख्या चित्रपटांमधील दमदार अभिनयाने प्रेक्षकांची मनं जिंकणारे ज्येष्ठ अभिनेते प्रदीप रावत यांचे निधन झाले आहे. वयाच्या 74व्या वर्षी त्यांनी अखेरचा श्वास घेतला. त्यांच्या निधनाची माहिती बॉलिवूड अभिनेते यशपाल शर्मा यांनी सोशल मीडियावर दिली आहे. प्रदीप रावत यांनी केवळ बॉलिवूडच नव्हे तर दक्षिण भारतीय चित्रपटसृष्टीतही आपल्या प्रभावी अभिनयाची छाप पाडली होती. प्रदीप रावत यांनी आपल्या अभिनय कारकिर्दीची सुरुवात बी. आर. चोप्रा यांच्या ‘महाभारत’ मालिकेत अश्वत्थामा ही भूमिका साकारून केली होती. त्यानंतर त्यांच्या इतरही भूमिका खूप गाजल्या.
प्रदीप रावत यांचे निधन
लगानमधील प्रदीप रावत यांचे सहकलाकार यशपाल शर्मा यांनी इंस्टाग्राम स्टोरीवर त्यांच्या निधनाची बातमी शेअर केली आहे. यात त्यांनी लिहिले की, ‘आपला ‘गजनी’, ‘लगान’मधील देवा प्रदीप रावत आता आपल्यात नाही. देव त्यांच्या आत्म्यास शांती देवो.’ एनडीटीव्ही या वृत्तवाहिनीशी बोलताना अभिनेत्री रोशनी अचरेजा यांनी प्रदीप रावत यांच्या निधनाच्या वृत्ताला दुजोरा दिला. रोशनी यांनी सांगितले की, ‘प्रदीप रावत हे गेल्या काही काळापासून कर्करोगाशी झुंज देत होते. सुरुवातीला त्यांच्यावर कोकिलाबेन रुग्णालयात उपचार सुरू होते. त्यानंतर त्यांना दुसऱ्या रुग्णालयात हलवण्यात आले होते, मात्र उपचारादरम्यान त्यांचे निधन झाले.
प्रदीप रावत यांची कारकीर्द
प्रदीप रावत यांनी राज बब्बर यांच्या ऐतबार या चित्रपटातून बॉलिवूडमध्ये पदार्पण केले. त्यानंतर त्यांनी अग्निपथ, पत्थर के फूल, संगदिल सनम, कोयला, सरफरोश आणि लगान यांसारख्या अनेक चित्रपटांत काम केले. मात्र, त्यांना खरी लोकप्रियता ‘गजनी’ चित्रपटामुळे मिळाली. 2008 मध्ये प्रदर्शित झालेल्या ‘गजनी’ चित्रपटात प्रदीप रावत यांनी मुख्य खलनायकाची भूमिका साकारली होती. त्यांच्या दमदार अभिनयाचे प्रेक्षक आणि समीक्षकांनी भरभरून कौतुक केले होते आणि ही भूमिका त्यांच्या कारकिर्दीतील सर्वाधिक गाजलेल्या भूमिकांपैकी एक ठरली.
तुमची आठवण येत राहील – सोनू सूद
अभिनेते सोनू सूद यांनी त्यांच्या इंस्टाग्राम स्टोरीवर प्रदीप रावत यांचा कृष्णधवल फोटो शेअर करत भावपूर्ण श्रद्धांजली वाहिली. त्यांनी लिहिले, ‘प्रदीप रावत भाऊ, तुमची उणीव कायम जाणवत राहील.’ यासोबतच त्यांनी ब्रोकन हॉर्ट आणि नमस्कार करणाऱ्या इमोजीचा वापर करून आपल्या भावना व्यक्त केल्या आहेत.
