IIM अहमदाबादमध्ये प्रवेश मिळाल्यानंतर ट्रोल झाल्याने बिग बींच्या नातीच्या प्रतिक्रियेनं जिंकली मनं

बॉलिवूडचे महानायक अर्थात अमिताभ बच्चन यांची नात नव्या नवेली नंदा नेहमीच कोणत्या ना कोणत्या कारणामुळे नेटकऱ्यांचं लक्ष वेधून घेते. स्टारकिड असूनही नव्या तिच्या साधेपणामुळे सोशल मीडियावर खूप प्रसिद्ध आहे. काही दिवसांपूर्वीच तिने IIM अहमदाबादमध्ये प्रवेश मिळाल्याची आनंदाची बातमी सोशल मीडियाद्वारे नेटकऱ्यांना सांगितली होती. मात्र यावरून काहींनी तिला ट्रोलसुद्धा केलं होतं. आता नुकत्याच एका कार्यक्रमात तिला या ट्रोलिंगविषयी प्रश्न विचारण्यात आला. त्यावर नव्याने अत्यंत विचारपूर्वक उत्तर दिलं आहे. सध्या तिच्या उत्तराचीच जोरदार चर्चा होत आहे.

नव्या म्हणाली, “सोशल मीडिया हे खूप ताकदीचं माध्यम आहे. जर त्याचा वापर योग्य पद्धतीने केला तर समाजात सकारात्मक बदल घडवून आणण्यासाठी त्याची खूप मोठी मदत होऊ शकते. आयआयएमसारख्या (IIM) अत्यंत प्रतिष्ठित संस्थेचा भाग बनण्याची संधी मिळाल्याबद्दल मी स्वत:ला खूप भाग्यवान समजते. माझ्या ट्रोलिंगबद्दल बोलायचं झाल्यास, सोशल मीडियावर स्वत:बद्दल व्यक्त होण्याचा निर्णय माझाच होता. माझ्या कामाबद्दल मी तिथे व्यक्त होते. लोकांनाही त्यांची मतं मांडण्याचा पूर्ण अधिकार आहे. त्यामुळे मी त्याविरोधात नाही आणि लोक जे म्हणतात, त्याचं मला वाईटही वाटत नाही.”

माझ्याबद्दल आणि माझ्या कामाबद्दल लोकांची जी प्रतिक्रिया आहे, ते स्वीकार करणं खूप महत्त्वाचं असल्याचंही ती म्हणाली. “माझ्याबद्दल आणि माझ्या कामाबद्दल लोक काय म्हणतायत हे पाहणं माझ्यासाठी खूप महत्त्वाचं आहे. यामुळे माझ्यात आणखी सुधारणा होईल आणि मी आणखी चांगली उद्योजिका, चांगली भारतीय बनू शकेन. माझ्या मते लोकांच्या फीडबॅककडे योग्य दृष्टीकोनातून पाहणं खूप गरजेचं आहे. त्यामुळे माझ्याबद्दल लोक जे काही म्हणतात, त्याबद्दल मी वाईट वाटून घेत नाही”, असंही तिने सांगितलं.

यावेळी नव्याने स्टारकिड असल्यामुळे तिला मिळत असलेल्या विशेष अधिकारांबद्दल कृतज्ञताही व्यक्त केली. “मी या गोष्टीचा स्वीकार करते की भारतातील बहुतांश लोकांपेक्षा एक वेगळं आयुष्य मी जगतेय. मला जन्मत:च काही विशेषाधिकार मिळाले आहेत. त्यामुळे कमी वयातच मला इतरांपेक्षा अधिक संधी मिळत आहेत. अर्थातच याबद्दल लोकांना काही बोलायचं असेल. मी खुल्या मनाने याचा विचार करण्याची खूप गरज आहे. लोकांच्या प्रतिक्रियांचा मी सकारात्मकपणे विचार केला तर माझ्यात आणि माझ्या कामात चांगले बदल घडू शकतील. त्यामुळे लोक नकारात्मकतेने काही बोलत असतील तरी त्याबद्दल फार विचार न करता स्वत:त काय बदल घडवता येतील हे मी पाहीन”, असं नव्या पुढे म्हणाली.