बाळासाहेब ठाकरेंचा नातू होणार यशराज फिल्म्सचा हिरो; बॉलिवूडमध्ये बनणार मोठा स्टार?

राजकीय क्षेत्रातील सर्वांत मोठ्या कुटुंबांपैकी एक असलेल्या ठाकरे कुटुंबातील एक सदस्य राजकारणापासून दूर चित्रपटसृष्टीत आपली नवी ओळख बनवण्याचा प्रयत्न करत आहे. बाळासाहेब ठाकरे यांचा नातू ऐश्वर्य ठाकरे गेल्या वर्षी अनुराग कश्यप दिग्दर्शित ‘निशांची’ या चित्रपटातून बॉलिवूडमध्ये पदार्पण केलं होतं. त्यानंतर आता त्याला यशराज फिल्म्स (YRF) बॅनरअंतर्गत एका मोठ्या प्रोजेक्टची ऑफर मिळाली आहे. अली अब्बास जफर या चित्रपटाचं दिग्दर्शन करणार असून या चित्रपटाचं शीर्षक अद्याप निश्चित झालं नाही. या रोमँटिक अॅक्शन चित्रपटात ऐश्वर्यसोबत अहान पांडे, शर्वरी वाघ आणि बॉबी देओल यांच्याही भूमिका आहेत. या चित्रपटाच्या निमित्ताने आदित्य चोप्रा आणि अली अब्बास जफर ही जोडगोळी पाचव्यांदा एकत्र काम करत आहे. पुढच्या वर्षी 26 मार्च रोजी ऐश्वर्यचा हा चित्रपट थिएटरमध्ये प्रदर्शित होणार आहे.

ऐश्वर्य ठाकरेची कौटुंबिक पार्श्वभूमी पूर्णपणे राजकीय आहे. त्याचे आजोबा बाळासाहेब ठाकरे आणि संपूर्ण कुटुंबाचं महाराष्ट्राच्या राजकारणात नेहमीच वर्चस्व राहिलं आहे. मात्र आपल्या कुटुंबाचा प्रस्थापित राजकीय वारसा पुढे चालवण्याऐवजी ऐश्वर्यने स्वत:ची वेगळी ओळख निर्माण करण्याचा निर्णय घेतला आहे. त्याला लहानपणापासूनच कला आणि चित्रपटांची खूप आवड होती. यामुळेच त्याने राजकारणाऐवजी चित्रपटसृष्टीतलं करिअर निवडलं आहे.

अभिनयक्षेत्रात पदार्पण करण्यापूर्वी ऐश्वर्यने त्यातील बारकावे नीट समजून घेतले होते. त्याने संजय लीला भन्साळी यांच्या 2015 मधील ब्लॉकबस्टर ‘बाजीराव मस्तानी’ या चित्रपटात सहाय्यक दिग्दर्शक म्हणून काम केलं होतं. त्यानंतर कॅमेरासमोर येण्यापूर्वी त्याने त्याचं अभिनयकौशल्य सुधारण्यासाठी बराच वेळ घेतला. अखेर अनुराग कश्यपच्या ‘निशांची’ या चित्रपटाच्या माध्यमातून त्याला पहिली ऑफर मिळाली.

प्रसिद्धीच्या झोतात असलेल्या इतर स्टारकिड्सच्या तुलनेत ऐश्वर्य सोशल मीडियावर फारसा सक्रिय नसतो. त्याचे इन्स्टाग्रामवर 17 हजार फॉलोअर्स आहेत. त्यावर त्याने फक्त आठ पोस्ट शेअर केल्या आहेत. यातील एका पोस्टमध्ये त्याने आजोबांसोबतचा एक खास थ्रोबॅक फोटोसुद्धा पहायला मिळतोय. ऐश्वर्य इन्स्टाग्रामवर कमी सक्रिय असला तरी त्याच्या टॅग केलेल्या व्हिडीओंमध्ये त्याचं उत्कृष्ट नृत्य कौशल्य दिसून येत आहे. चित्रपटसृष्टीत येण्यापूर्वीच ऐश्वर्याचं वैयक्तिक आयुष्य चर्चेचा विषय ठरला होतं. अभिनेत्री अलाया एफसोबत तो रिलेशनशिपमध्ये असल्याच्या चर्चा होत्या. मात्र अलायाने या चर्चा फेटाळत तो फक्त जवळचा मित्र असल्याचं स्पष्ट केलं होतं.