“दारू पाजून शारीरिक शोषण, मागितली माफी अन्..”; प्रसिद्ध अभिनेत्रीकडून पार्टनरवर गंभीर आरोप

मुंबई | 4 सप्टेंबर 2023 : भोजपुरी संगीतविश्व आणि चित्रपटांमध्ये नाव कमावलेली अभिनेत्री प्रियांशु सिंह सध्या तिच्या खासगी आयुष्यामुळे चर्चेत आहे. तिने सहअभिनेता आणि पार्टनर पुनीत सिंहवर लग्नाचं आमिष देऊन शारीरिक शोषण केल्याचा आरोप केला आहे. याप्रकरणी प्रियांशुने पोलिसांत पुनीविरोधात तक्रार दाखल केली आहे. पुनीतने दोन वर्षांपर्यंत माझं शारीरिक शोषण केलं, असा आरोप तिने केला आहे. नुकत्याच दिलेल्या एका मुलाखतीत तिने याचा खुलासा केला. “सतत लग्नाचं आमिष देऊन, बळजबरीने दारू पाजून पुनीतने माझं लैंगिक शोषण केलं. गेल्या दोन वर्षांपासून हे सर्व सहन करतेय”, असं प्रियांशुने म्हटलंय.

लग्नाचं आमिष दाखवून शारीरिक शोषण

“पुनीत मला सतत म्हणायचा की आपण लवकरच लग्न करू. नंतर मला दारू पाजून माझं शारीरिक शोषण करायचा आणि दुसऱ्या दिवशी माफी मागायचा. जेव्हा मी पोलिसांत तक्रार दाखल करण्याची धमकी दिली, तेव्हा तो म्हणाला की लग्नबद्दल कुटुंबीयांकडे विचारणा करेन. आपल्या दोघांची जात एकच आहे, त्यामुळे लग्नात कुटुंबीय कोणताच अडथळा आणू शकणार नाही, असं तो सतत मला म्हणायचा”, असं प्रियांशु म्हणाली.

गेल्या दोन वर्षांपासून अत्याचार

प्रियांशु मुंबईत तिच्या बहिणीसोबत राहायची. तेव्हा पुनीत सतत तिच्या घरी यायचा. अनेकदा तो प्रियांशुकडे जेवायला जायचा आणि त्यादरम्यान दोघांची मैत्री झाली. जेव्हा प्रियांशुची बहीण घरातून निघून गेली, तेव्ही पुनीत दारूच्या नशेत तिच्या घरी जाऊ लागला. भोजपुरी इंडस्ट्रीत काम मिळावं यासाठी त्याने माझ्यासोबत मैत्री केली, असाही आरोप प्रियांशुने केला. मदतीचं आश्वासन दिल्यानंतर त्याने माझा गैरफायदा घेतला, असं तिने सांगितलं. 2021 मध्ये प्रियांशु आणि पुनीतची ओळख झाली आणि तेव्हापासून तो तिचं शारीरिक शोषण करतोय.

पुनीतविरोधात कलम 376 आणि 377 अंतर्गत गुन्हा दाखल करण्यात आला आहे. प्रियांशु सिंह ही भोजपुरी फिल्म इंडस्ट्रीतील लोकप्रिय अभिनेत्री आहे. तिने आतापर्यंत बऱ्याच भोजपुरी चित्रपटांमध्ये आणि म्युझिक व्हिडीओमध्ये काम केलं आहे.