Athiya Shetty-KL Rahul: “अथियाचं के. एल. राहुलशी लग्न तेव्हाच होऊ शकेल जेव्हा..”, चर्चांवर अखेर सुनील शेट्टींनी सोडलं मौन
अथियाचा भाऊ अहान शेट्टीच्या 'तडप' या पदार्पणाच्या चित्रपटाच्या प्रीमिअरला के. एल. राहुलने हजेरी लावली होती. तेव्हापासूनच दोघांचं नातं 'ऑफिशिअल' झाल्याचं म्हटलं जातंय.
अभिनेत्री अथिया शेट्टी (Athiya Shetty) आणि क्रिकेटर के. एल. राहुल (KL Rahul) यांच्या लग्नाच्या सध्या जोरदार चर्चा आहेत. या चर्चांवर आता अथियाचे वडील सुनील शेट्टी (Suniel Shetty) यांनी प्रतिक्रिया दिली आहे. के. एल. राहुलचं वेळापत्रक अत्यंत व्यग्र असल्याने जेव्हा त्याला मोकळा वेळ मिळेल तेव्हा दोघं लग्नगाठ बांधणार असल्याचं त्यांनी सांगितलं. मॅचेसदरम्यान मिळालेल्या फक्त दोन दिवसांच्या ब्रेकमध्ये लग्न होऊ शकत नाही, असंही ते म्हणाले. गेल्या काही वर्षांपासून अथिया आणि के. एल. राहुल एकमेकांना डेट करत आहेत. इतकंच नव्हे तर लग्नापूर्वी दोघं लिव्ह-इनमध्ये राहणार असल्याचंही कळतंय.
काय म्हणाले सुनील शेट्टी?
एका पत्रकाराने सुनील शेट्टी यांना मुलीच्या लग्नाबद्दल विचारल तेव्हा ते म्हणाले, “मला वाटतं जेव्हा मुलं निश्चित करतील, तेव्हा लग्न होईल. राहुलचं वेळापत्रक खूप व्यग्र आहे. आता आशिय कप आहे, वर्ल्ड कप आहे, साऊथ आफ्रिका टूर आहे, ऑस्ट्रेलिया टूर आहे. जेव्हा मुलांना ब्रेक मिळेल तेव्हा ते लग्न करतील. एका दिवसात तर लग्न होऊ शकत नाही ना? मी वडील आहे म्हणून मला वाटतं की मुलीचं लग्न वेळेत व्हावं, मात्र जेव्हा राहुलला वेळ मिळेल तेव्हा ते दोघं मिळून त्याबाबत निर्णय घेतील. तुम्ही कॅलेंडर पाहिलात तर घाबरूनच जाल. फक्त एक-दोन दिवसांचा ब्रेक त्याला मिळतोय आणि दोन दिवसांत लग्न होऊ शकत नाही. त्यामुळे जेव्हा त्याला वेळ मिळेल तेव्हा प्लॅनिंग नक्की सुरू होईल.”
अथियाचा भाऊ अहान शेट्टीच्या ‘तडप’ या पदार्पणाच्या चित्रपटाच्या प्रीमिअरला के. एल. राहुलने हजेरी लावली होती. तेव्हापासूनच दोघांचं नातं ‘ऑफिशिअल’ झाल्याचं म्हटलं जातंय. हे दोघं सोशल मीडियावर एकमेकांसोबतचे फोटो पोस्ट करत जाहीर प्रेम व्यक्त करताना दिसतात.
