Chhaava Teaser : विकी कौशलच्या ‘छावा’चा टीझर पाहून अंगावर येईल काटा!
लक्ष्मण उतेकर दिग्दर्शित 'छावा' या चित्रपटाचा टीझर प्रदर्शित झाला असून त्यावर नेटकऱ्यांकडून लाइक्स आणि कमेंट्सचा वर्षाव होतोय. या चित्रपटात अभिनेता विकी कौशलने छत्रपती संभाजी महाराजांची भूमिका साकारली आहे.
अभिनेता विकी कौशलच्या आगामी ‘छावा’ या चित्रपटाचा जबरदस्त टीझर रक्षाबंधनच्या निमित्ताने सोशल मीडियावर लाँच करण्यात आला आहे. ‘स्वराज्याचे संरक्षक, धर्माचे रक्षक.. छावा – एका शूर योद्ध्याची महाकथा,’ असं कॅप्शन देत विकी कौशलने हा टीझर पोस्ट केला आहे. हा टीझर पाहून अंगावर काटा आल्याच्या प्रतिक्रिया नेटकऱ्यांनी दिल्या आहेत. यामध्ये विकीने छत्रपती संभाजी महाराजांची भूमिका साकारली आहे. टीझरमधील त्याचा रुद्रावतार पाहून अंगावर काटा आल्याशिवाय राहत नाही. जवळपास एक मिनिटाच्या या टीझरमध्ये अभिनेता अक्षय खन्नाच्या भूमिकेचीही झलक पहायला मिळते.
‘छत्रपती शिवाजी महाराज को शेर कहते है और शेर के बच्चे को छावा..’ या दमदार संवादाने टीझरची सुरुवात होते. ‘छावा’ म्हणताच विकी कौशलची जबरदस्त एण्ट्री होते आणि युद्धाची काही दृश्ये पाहिल्यानंतर अंगावर काटा येतो. या टीझरमध्ये आणखी एक गोष्ट विशेष लक्ष वेधून घेते ते म्हणजे बॅकग्राऊंड म्युझिक. हा टीझर पोस्ट करताच नेटकऱ्यांनी त्यावर कमेंट्स आणि लाइक्सचा वर्षाव केला आहे.
पहा टीझर-
‘अंगावर काटा आला’, असं सोशल मीडिया इन्फ्लुएन्सर प्राजक्ता कोळीने म्हटलंय. तर ‘तूच रे छावा’, असं आणखी एका युजरने म्हटलंय. कमेंटमध्ये अनेकांनी विकीच्या अष्टपैलू अभिनयकौशल्याचं कौतुक केलंय. ‘काही दिवसांपूर्वी ‘तौबा तौबा’ या गाण्यावरील डान्सने चाहत्यांना वेड लावणारा हाच विकी कौशल आता अत्यंत वेगळ्या भूमिकेत तितकाच शोभून दिसतोय’, असं नेटकऱ्यांनी म्हटलंय. या चित्रपटासाठी विकी कौशलने बरीच मेहनत घेतली आहे. त्याचं ट्रान्सफॉर्मेशन या टीझरमध्ये सहज पहायला मिळतंय. या चित्रपटात विकी कौशल हा छत्रपती शिवाजी महाराज यांचे पुत्र छत्रपती संभाजी महाराजांची भूमिका साकारणार आहे. या भूमिकेसाठी त्याने तलवारबाजी आणि घोडेस्वारीचंही प्रशिक्षण घेतलं आहे.
‘छावा’ या चित्रपटाचं दिग्दर्शन लक्ष्मण उतेकर यांनी केलं असून ‘स्त्री 2’चे निर्माते दिनेश विजन यांनीच या चित्रपटाची निर्मिती केली आहे. ऑस्कर विजेते संगीतकार ए. आर. रेहमान यांनी या चित्रपटाला संगीत दिलं आहे. यामध्ये विकी कौशलसोबतच रश्मिका मंदाना, अक्षय खन्ना, आशुतोष राणा, दिव्या दत्ता, सुनील शेट्टी यांच्याही भूमिका आहेत. येत्या 6 डिसेंबर रोजी हा चित्रपट थिएटरमध्ये प्रदर्शित होणार आहे.
