हाय हिल्स, बिकिनीमध्ये डेबिनाचं मॅटर्निटी फोटोशूट; नेटकऱ्यांकडून टीकांचा भडीमार
'लाज वाटली पाहिजे तुला'; मॅटर्निटी फोटोशूट पाहून डेबिनावर भडकले नेटकरी
मुंबई- प्रसिद्ध टेलिव्हिजन अभिनेत्री डेबिना बॅनर्जी लवकरच आई होणार आहे. डेबिना आणि गुरमीत चौधरी यांच्या घरात पुन्हा एकदा चिमुकल्या पाहुण्याचं आगमन होणार आहे. काही महिन्यांपूर्वीच डेबिनाने मुलगी लिएनाला जन्म दिला होता. नुकतेच तिने सोशल मीडियावर मॅटर्निटी फोटोशूटचे काही फोटो आणि व्हिडीओ पोस्ट केले आहेत. मात्र या व्हिडीओमुळे डेबिना ट्रोलर्सच्या निशाण्यावर आली आहे.
डेबिनाने काळ्या रंगाचा बिकिनी आणि त्यावर ओव्हरसाइज्ड शर्ट परिधान करत फोटोशूट केला आहे. त्यावर त्याच रंगसंगतीचे हाय हिल्स तिने घातले आहेत. मात्र तिचा हा लूक चाहत्यांना पसंत पडला नाही. अनेकांनी कमेंट करत डेबिनावर टीका केली आहे.
मॅटर्निटी फोटोशूटच्या नावाखाली डेबिनाने अंगप्रदर्शन केल्याचं नेटकऱ्यांनी म्हटलंय. ‘भारतीय कपड्यांमध्येही चांगलं फोटोशूट करता आलं असतं’, असं एका युजरने लिहिलं. तर ‘पाश्चिमात्य कपड्यांनाच फॉलो केलं पाहिजे असा काही नियम नाही’, असं दुसऱ्याने म्हटलंय. ‘तुला लाज वाटली पाहिजे, ही भारतीय संस्कृती नाही’ अशा शब्दांत नेटकऱ्यांनी डेबिनाला ट्रोल केलंय.
View this post on Instagram
डेबिनाने जेव्हा दुसऱ्यांदा गरोदर असल्याचं जाहीर केलं, तेव्हासुद्धा ती ट्रोलर्सच्या निशाण्यावर आली होती. पहिल्या मुलीच्या प्रसूतीनंतर चार महिन्यांनी तिने दुसऱ्यांदा गरोदर असल्याचं जाहीर केलं होतं. एका युजरने डेबिनाला विचारलं होतं की, दुसऱ्यांदा गर्भधारणेपूर्वी तुम्ही लियानाला थोडा वेळ दिला पाहिजे असं तुम्हाला वाटत नाही का? यावर डेबिना म्हणाली होती, “मी पण तुम्हाला एक प्रश्न विचारते. जेव्हा काहींना जुळी मुलं होतात, तेव्हा ते काय करतात?”
डेबिना बॅनर्जी आणि गुरमीत चौधरी हे टीव्हीवरील सर्वांत लोकप्रिय जोडप्यांपैकी एक आहेत. गुरमीत आणि डेबिनाने ‘रामायण’ या मालिकेत एकत्र काम करून लोकप्रियता मिळवली.
