Deool Band 2 : ‘देऊळ बंद 2’ची कमाई सुसाट; रितेश देशमुखच्या चित्रपटाला मागे टाकत मिळवलं चौथं स्थान

स्नेहल तरडे आणि मोहन जोशी यांच्या मुख्य भूमिका असलेला ‘देऊळ बंद 2’ हा चित्रपट बॉक्स ऑफिसवर जबरदस्त कामगिरी करतोय. 21 मे रोजी प्रदर्शित झालेल्या या चित्रपटाचा थिएटरमध्ये तिसरा आठवडाही दमदार सुरू आहे. अवघ्या दहा कोटी रुपयांच्या बजेटमध्ये बनलेल्या या चित्रपटाने चांगलं यश मिळवलं आहे. प्रदर्शनाच्या तिसऱ्या मंगळवारी या चित्रपटाने रितेश देशमुखच्या ‘वेड’ या चित्रपटालाही कमाईच्या बाबतीत मागे टाकलं आहे. प्रवीण तरडे लिखित-दिग्दर्शित ‘देऊळ बंद 2’ हा आता सर्वाधिक कमाई करणारा चौथा मराठी चित्रपट ठरला आहे.

गेल्या 20 दिवसांत ‘देऊळ बंद 2’ची कमाई

प्रदर्शनाच्या तिसऱ्या मंगळवारी म्हणजेच 20 व्या दिवशी या चित्रपटाने बॉक्स ऑफिसवर 1.1 कोटी रुपयांचा गल्ला जमवला आहे. एकोणिसाव्या दिवसाच्या तुलनेत विसाव्या दिवशी फक्त 4.34 टक्क्यांची घट झाली. 19 व्या दिवसाची कमाई 1.15 कोटी रुपये झाली होती. या चित्रपटाने आतापर्यंत भारतात 62 कोटी रुपयांची नेट कमाई केली आहे. तर ग्रॉस कलेक्शनचा आकडा 73.16 कोटी रुपयांवर पोहोचला आहे. या चित्रपटाची गती पाहता येत्या काही दिवसांतच कमाईचा 75 कोटींचा आकडा सहज पार होईल.

‘देऊळ बंद 2’ची कमाई

• पहिला आठवडा (आठ दिवस)- 30.2 कोटी रुपये
• दुसरा आठवडा- 22.4 कोटी रुपये
• सोळावा दिवस- 1.4 कोटी रुपये
• सतरावा दिवस- 2.6 कोटी रुपये
• अठरावा दिवस- 3.15 कोटी रुपये
• एकोणिसावा दिवस- 1.15 कोटी रुपये
• विसावा दिवस- 1.1 कोटी रुपये
• एकूण कमाई- 62 कोटी रुपये

62 कोटी रुपयांची कमाई करून ‘देऊळ बंद 2’ने भारतीय बॉक्स ऑफिसवर रितेश देशमुखच्या ‘वेड’ या चित्रपटाला सहज मागे टाकलं आहे. ‘वेड’ने 61.2 कोटी रुपयांची कमाई केली होती. आता देऊळ बंद 2 हा चित्रपट चौथा सर्वाधिक कमाई करणारा मराठी चित्रपट बनला आहे. तर तिसऱ्या स्थानावर ‘बाईपण भारी देवा’ (76.28 कोटी रुपये) हा चित्रपट आहे. तिसऱ्या स्थानावर पोहोचण्यासाठी ‘देऊळ बंद 2’ला आणखी 14.29 कोटी रुपयांची कमाई करणं गरजेचं आहे.

भारतीय बॉक्स ऑफिसवर सर्वाधिक कमाई करणारे टॉप 10 मराठी चित्रपट (नेट कलेक्शन)

1. राजा शिवाजी- 105.64 कोटी रुपये
2. सैराट- 90 कोटी रुपये
3. बाईपण भारी देवा- 76.28 कोटी रुपये
4. देऊळ बंद 2- 62 कोटी रुपये
5. वेड- 61.2 कोटी रुपये
6. नटसम्राट- 42 कोटी रुपये
7. पावनखिंड- 37.72 कोटी रुपये
8. लय भारी- 37 कोटी रुपये
9. कट्यार काळजात घुसली- 35 कोटी रुपये
10. ठाकरे- 31.6 कोटी रुपये