स्वामींचा आशीर्वाद! ‘देऊळ बंद 2’ने कमावला बंपर नफा; ‘राजा शिवाजी’, ‘दृश्यम 3’लाही टाकलं मागे
Deool Band 2 Profit : प्रवीण तरडेंच्या 'देऊळ बंद 2' या चित्रपटाने बॉक्स ऑफिसवर जबरदस्त कामगिरी केली आहे. या चित्रपटाने आतापर्यंत सर्वाधिक नफा कमावला आहे. याबाबतीत 'राजा शिवाजी', 'दृश्यम 3' यांसारख्या चित्रपटांनाही मागे टाकलं आहे.
मे महिन्यात बॉक्स ऑफिसवर एकापेक्षा एक दमदार चित्रपट प्रदर्शित झाले. विविध भाषांमधील या चित्रपटांमध्ये ‘करुप्पू’, ‘राजा शिवाजी’, ‘दृश्यम 3’ यांसारख्या चित्रपटांचा समावेश होता. या तिन्ही चित्रपटांनी मिळून 100 कोटी रुपयांपेक्षा जास्त कमाई केली. मात्र मे महिन्यातील टॉप 5 चित्रपटांमध्ये नफ्याच्या टक्केवारीच्या बाबतीत एका कमी बजेटच्या मराठी चित्रपटाने सर्वांना मागे टाकलं आहे. हा चित्रपट दुसरा-तिसरा कोणता नसून प्रवीण तरडेंचा ‘देऊळ बंद 2’ हा आहे. हा सर्वाधिक नफा कमावणारा मराठी चित्रपट ठरला आहे. ओरमॅक्स मीडियाने मे महिन्यातील टॉप 5 चित्रपटांची यादी जाहीर केली आहे. या यादीत सूर्या आणि त्रिशा कृष्णनची मुख्य भूमिका असलेला ‘करुप्पू’ 229 कोटी रुपयांच्या कमाईसह पहिल्या क्रमांकावर आहे.
मोहनलाल यांचा ‘दृश्यम 3’ हा चित्रपट 133 कोटी रुपयांच्या कमाईसह या यादीत दुसऱ्या क्रमांकावर आहे. तर ‘राजा शिवाजी’ या चित्रपटाने 113 कोटी रुपयांची कमाई करत तिसरं स्थान पटकावलं आहे. या यादीत एका हॉलिवूड हॉरर चित्रपटाचाही समावेश आहे. या चित्रपटाने जगभरासह भारतातही धुमाकूळ घातला आहे. 102 कोटी रुपयांची कमाई करून हा हॉरर चित्रपट चौथ्या क्रमांकावर पोहोचला आहे. तर ‘देऊळ बंद 2’ हा चित्रपट 90 कोटी रुपयांच्या कमाईसह पाचव्या स्थानी आहे.
‘देऊळ बंद 2’ने कमावला तब्बल इतका नफा
बॉक्स ऑफिसवर नफा कमावण्याच्या बाबतीत प्रवीण तरडेंचा ‘देऊळ बंद 2’ हा चित्रपट आघाडीवर आहे. अवघ्या 10 कोटी रुपयांच्या बजेटमध्ये बनलेल्या या चित्रपटाने बॉक्स ऑफिसवर आतापर्यंत 90 कोटी रुपयांची कमाई केली आहे. अजूनही थिएटरमध्ये या चित्रपटाला प्रेक्षकांकडून दमदार प्रतिसाद मिळतोय. ‘देऊळ बंद 2’ने बजेटवर आतापर्यंत तब्बल 800% नफा कमावला आहे. दरम्यान ‘करुप्पू’ या दाक्षिणात्य चित्रपटाने 76.15 टक्के नफा आपल्या नावे केला आहे. 130 कोटी रुपयांच्या बजेटमध्ये बनलेल्या या चित्रपटाने बॉक्स ऑफिसवर 229 कोटी रुपयांची कमाई केली आहे.
रितेश देशमुखच्या ‘राजा शिवाजी’ या चित्रपटाचा बजेट 75 कोटी रुपयांचा होता आणि बॉक्स ऑफिसवर या चित्रपटाने 113 कोटी रुपये कमावून 50.67% नफा मिळवला आहे. तर 100 कोटी रुपयांच्या बजेटमधील सस्पेन्स थ्रिलर ‘दृश्यम 3’ने 133 कोटी रुपये कमावून 33 टक्के नफा मिळवला आहे.
‘देऊळ बंद 2’ हा चित्रपट 21 मे 2026 रोजी थिएटरमध्ये प्रदर्शित झाला. प्रवीण तरडे दिग्दर्शित या चित्रपटात मोहन जोशी, स्नेहल तरडे, प्रवीण तरडे, महेश मांजरेकर आणि प्रसाद ओक यांच्या भूमिका आहेत.
