350 दिवस थिएटरमध्ये सुरु होता हा चित्रपट, सर्व गाणी ठरलेली सुपरहिट, आजही लोक..
350 दिवस थिएटरमध्ये सुरु होता हा चित्रपट. ज्यामधील 6 च्या 6 गाणी ठरली होती प्रचंड सुपरहिट. रफी- आशा भोसले यांच्या आवाजामुळे 60 वर्षांपासून लोकप्रिय.
हिंदी चित्रपटसृष्टीतील दिग्गज अभिनेते धर्मेंद्र आणि अभिनेत्री मीना कुमारी यांचा ‘फूल और पत्थर’ हा चित्रपट 1966 मध्ये प्रदर्शित झाला होता. या चित्रपटाने धर्मेंद्र यांच्या करिअरला नवी दिशा दिली. तब्बल 50 आठवडे म्हणजेच जवळपास 350 दिवस चित्रपटगृहांमध्ये चाललेल्या या चित्रपटाचा त्या काळात मोठा बोलबाला होता. ओ. पी. रल्हन यांनी या चित्रपटाचे दिग्दर्शन केले होते.
चित्रपटात धर्मेंद्र यांच्यासोबत मीना कुमारी, शशिकला आणि ललिता पवार यांसारखे कलाकार महत्त्वाच्या भूमिकांमध्ये दिसले होते. दमदार कथा, प्रभावी अभिनय आणि सुरेल संगीत यामुळे या चित्रपटाला प्रेक्षकांची पसंती मिळाली.
धर्मेंद्र यांच्या करिअरमधील महत्त्वाचा टप्पा
‘फूल और पत्थर’मध्ये धर्मेंद्र यांनी शाका नावाच्या कठोर स्वभावाच्या आणि गुन्हेगारी विश्वाशी जोडलेल्या तरुणाची भूमिका साकारली होती. तर मीना कुमारी यांनी शांती देवी ही व्यक्तिरेखा साकारली. एका विधवा महिलेच्या आयुष्यातील संघर्ष आणि अडचणींचा शाकाच्या जीवनावर होणारा परिणाम ही चित्रपटाच्या कथानकाची महत्त्वाची बाजू होती.
शांतीच्या आयुष्यातील परिस्थिती पाहून शाकाच्या विचारांमध्ये आणि वागण्यात बदल होऊ लागतो. या कथेमधून मानवी भावनांचा आणि परिवर्तनाचा प्रवास दाखवण्यात आला आहे.
हा चित्रपट धर्मेंद्र यांच्या करिअरमधील पहिल्या मोठ्या यशस्वी चित्रपटांपैकी एक मानला जातो. या चित्रपटाच्या यशामुळे धर्मेंद्र यांना स्टारडम मिळवण्यास मोठी मदत झाली. तसेच, धर्मेंद्र आणि मीना कुमारी यांची जोडीही प्रेक्षकांमध्ये लोकप्रिय झाली.
60 वर्षांनंतरही गाण्यांची लोकप्रियता कायम
‘फूल और पत्थर’ चित्रपटाचे यश केवळ बॉक्स ऑफिसपुरते मर्यादित राहिले नाही. चित्रपटातील गाणी आजही जुन्या हिंदी चित्रपटसंगीताच्या चाहत्यांमध्ये ऐकली जातात. मोहम्मद रफी आणि आशा भोसले यांच्या आवाजातील गाण्यांनी चित्रपटाच्या संगीताला वेगळी ओळख मिळवून दिली.
1966 मधील सर्वाधिक कमाई करणाऱ्या चित्रपटांमध्ये ‘फूल और पत्थर’चा समावेश असल्याचे सांगितले जाते. या चित्रपटासाठी धर्मेंद्र यांना फिल्मफेअरच्या सर्वोत्कृष्ट अभिनेत्याच्या पुरस्कारासाठी नामांकनही मिळाले होते. धर्मेंद्र यांच्या अभिनय कारकिर्दीतील महत्त्वाचा टप्पा ठरलेला ‘फूल और पत्थर’ आजही जुन्या हिंदी चित्रपटांच्या चाहत्यांच्या आठवणीत कायम आहे.
