Dhurandhar 2 OTT : ‘धुरंधर 2’च्या ओटीटी रिलीजवर भडकले प्रेक्षक; जियो हॉटस्टारची नवी कल्पना महागात

जगभरातील थिएटर्समध्ये धुमाकूळ घातल्यानंतर आदित्य धर दिग्दर्शित ‘धुरंधर : द रिव्हेंज’ हा दुसरा भाग अखेर ओटीटीवर प्रदर्शित झाला. 4 जून रोजी जियो हॉटस्टार या ओटीटी प्लॅटफॉर्मवर याचं प्रीमिअर झालं. 2025 च्या अखेरीस प्रदर्शित झालेल्या ‘धुरंधर’ या चित्रपटानंतर दुसऱ्या भागाची प्रचंड उत्सुकता होती. त्यानंतर हा दुसरा भाग ओटीटीवर कधी येणार, याचीही प्रतीक्षा जगभरातील प्रेक्षक करत होते. मात्र ओटीटीवर प्रदर्शित झालेल्या या चित्रपटावरून प्रेक्षकांनी तीव्र नाराजी व्यक्त केली आहे. यामागचं कारण म्हणजे जियो हॉटस्टारने त्यांच्या ओटीटी प्लॅटफॉर्मवर थेट हा चित्रपट प्रदर्शित करण्याऐवजी त्यांनी ‘धुरंधर 2’चं लाइव्ह स्ट्रीमिंग केलं.

4 जून रोजी संध्याकाळी 7 वाजता जियो हॉटस्टारवर रणवीर सिंहच्या या बहुचर्चित चित्रपटाचं लाइव्ह प्रीमिअर आयोजित करण्यात आलं होतं. यामध्ये प्री-शो सेगमेंट आणि काही कॉमेंटरी ब्रेक्सचाही समावेश होता. प्रेक्षकांना प्रीमिअम अनुभव मिळावा यासाठी जियो हॉटस्टारने अशा पद्धतीची मार्केटिंग स्ट्रॅटेजी आखली असली तरी प्रेक्षकांना ती अजिबात रुचली नाही. प्रेक्षकांना सलग या चित्रपटाचा आनंद घेता आला नाही, त्यामुळे त्यांनी सोशल मीडियावर टीका करण्यास सुरुवात केली.

प्रेक्षकांच्या प्रतिक्रिया

@JioHotstar could’ve simply released #Dhurandhar2‌TheRevenge as it is without the drama of this live streaming premiere and people could’ve enjoyed it.

Now there are 2 things that will happen: 1. People who did not watch the movie starting 7PM will be unable to watch it in its…

— Udit Vikhe (@UVikhe) June 4, 2026

#Dhurandhar2‌TheRevenge Premiere on #JioHotstar is a shit show. Pre recorded and scripted pre screening, pathetically obvious, forced and unnecessary. Forced PR.#dhurandhar‌therevenge #Dhurandhar2‌ #dhurandhar #ranveersingh

— Harshith (@Harshith7694) June 4, 2026

‘यापेक्षा तर थेट प्रीमिअरच केलं असतं’, असं एकाने लिहिलं. तर ‘जियो हॉटस्टारने थेट धुरंधर : द रिव्हेंज हा चित्रपट प्रदर्शित करायला पाहिजे होता. हा लाइव्ह स्ट्रीमिंग प्रीमिअरचा ड्रामा कशासाठी हवा’, असा सवाल दुसऱ्या युजरने केला. काहींनी असंही निदर्शनास आणलं की, ज्या प्रेक्षकांनी संध्याकाळी 7 वाजताचं सुरुवातीचं प्रक्षेपण चुकवलं, त्यांना तो संपूर्ण कार्यक्रम संपेपर्यंत चित्रपट पाहता येणार नाही. तर दुसरीकडे थेट प्रेक्षपण पाहणाऱ्या प्रेक्षकांना समालोचनातील व्यत्ययांना सामोरं जावं लागलं, ज्यामुळे चित्रपट कोणत्याही ब्रेकशिवाय पाहण्याचा त्यांचा अनुभव खराब झाला. सोशल मीडियावर अनेकांनी याबद्दल नाराजी व्यक्त केली असून लाइव्ह स्ट्रीमिंग अनावश्यक असल्याचं म्हटलं आहे.

जियो हॉटस्टारने 50 हून अधिक ब्रँड पार्टनर्स आणि 30 मिनिटांच्या प्री-शो इव्हेंटसह या चित्रपटाच्या प्रदर्शनाला ‘रॉ अँड अनदेखा’ या विशेष डिजिटल प्रीमिअरच्या रुपात प्रसिद्धी दिली. परंतु या अतिरिक्त ब्रँडिंग आणि पूर्वनियोजित स्वरुपामुळे चित्रपट बघण्याच्या आनंदाच व्यत्यय आल्याची तक्रार प्रेक्षकांनी केली.