Rahul Vaidya | राहुल वैद्य लवकरच होणार बाबा; दिशा परमारने दिली ‘गुड न्यूज’

Disha Parmar and Rahul Vaidya

Image Credit source: Instagram

मुंबई : ‘इंडियन आयडॉल’ या गाण्याच्या रिॲलिटी शोमधून घराघरात पोहोचलेला गायक राहुल वैद्य लवकरच बाबा होणार आहे. पत्नी दिशा परमारसोबतचा फोटो पोस्ट करत राहुलने चाहत्यांना ही आनंदाची बातमी सांगतली. यासोबतच त्यांनी सोनोग्रामचाही फोटो पोस्ट केला आहे. राहुल आणि दिशावर चाहत्यांकडून शुभेच्छांचा वर्षाव होतोय. इन्स्टाग्रामवर पोस्ट केलेल्या या फोटोमध्ये दिशाचा बेबी बंप सहज पहायला मिळतोय. तर राहुलच्या हातातील छोट्या पाटीवर ‘मम्मी अँड डॅडी’ असं लिहिलंय.

जास्मिन भसीन, नकुल मेहता, अदा खान, दिव्यांका त्रिपाठी, टोनी कक्कर, रश्मी देसाई, दृष्टी धामी, शालीन भनोट यांसारख्या सेलिब्रिटींनीही राहुल-दिशावर शुभेच्छांचा वर्षाव केला आहे. दिशा परमार आणि राहुल वैद्यने 16 जुलै 2021 रोजी मुंबईत लग्नगाठ बांधली. या दोघांचे सोशल मीडियावर लाखो चाहते आहेत. दिशाने ‘प्यार का दर्द मिठा मिठा प्यारा प्यारा’ आणि ‘बडे अच्छे लगते है 2’ यांसारख्या मालिकांमध्ये भूमिका साकारल्या आहेत. 2012 मध्ये तिने अभिनयात पदार्पण केलं. तर 2005 मध्ये राहुलने ‘इंडियन आयडॉल’च्या पहिल्या सिझनमध्ये भाग घेतला होता. यामध्ये तो तिसऱ्या क्रमांकावर होता. ‘जान-ए-मन’ आणि ‘रेस 2’ यांसारख्या चित्रपटांमध्ये त्याने गाणी गायली आहेत. दिशा आणि राहुल नुकतेच ‘प्रेम कहानी’ या म्युझिक व्हिडीओमध्ये एकत्र झळकले होते.

राहुल-दिशाची लव्हस्टोरी

राहुल वैद्य आणि दिशा परमार यांना एकमेकांच्या जवळ आणण्यात त्यांच्या मित्रांचा मोठा वाटा आहे. सोशल मीडियानेही या दोघांच्या नात्यात महत्त्वपूर्ण भूमिका बजावली आहे. राहुल आणि दिशाची पहिली भेट एका कॉमन मित्राद्वारे झाली. दिशाने एका मुलाखतीत सांगितलं होतं की, “मला त्याचं एक गाणं खूप आवडलं होतं आणि मी त्याच्या पोस्टवर लव्हची प्रतिक्रिया दिली.‘ त्याचवेळी राहुल म्हणाला होता की, “मला वाटलं की, ती इतकी सुंदर मुलगी आहे तर मी संधी कशी सोडू? मी दिशाला लगेच मेसेज केला आणि त्यानंतर आमचं बोलणं सुरू झालं. आम्ही फोन नंबरची देवाणघेवाण केली. मी ‘याद तेरी’ गाण्याचं शूटिंग दिल्लीत करत असताना आमची पहिली भेट झाली.”