Drishyam 3: रिलीजआधीच ‘दृश्यम 3’ची बंपर कमाई; 48 तासांत तुफान तिकिट विक्री, सर्व रेकॉर्ड मोडणार?

Drishyam 3: अजय देवगणचा बहुप्रतीक्षित ‘दृश्यम 3’ अर्थात ‘दृश्यम: द कन्क्लुजन’ हा चित्रपट लवकरच प्रेक्षकांच्या भेटीला येणार आहे. चित्रपटाच्या प्रदर्शनाला अवघे काही दिवस शिल्लक असतानाच ॲडव्हान्स बुकिंगला जोरदार प्रतिसाद मिळत आहे. 29 सप्टेंबरच्या दुपारपर्यंत चित्रपटाने पहिल्या दिवसाच्या ॲडव्हान्स बुकिंगमधून तब्बल 8.97 कोटी रुपयांची कमाई केल्याची माहिती समोर आली. पहिल्या तीन दिवसांसाठी मिळून हा आकडा 17.35 कोटी रुपयांवर पोहोचला आहे. ‘दृश्यम 3’च्या पहिल्या दिवसासाठी आतापर्यंत सुमारे 2.24 लाख तिकिटांची विक्री झाली असून 7505 शो बुक झाले आहेत. यामध्ये ब्लॉक सीट्सच्या रकमेसह तीन दिवसांच्या ॲडव्हान्स बुकिंगचा आकडा 17.35 कोटी रुपये असल्याचं वृत्त आहे.

महाराष्ट्रातून पहिल्या दिवसाच्या बुकिंगमधून सुमारे 2.93 कोटी, तर दिल्लीमधून 2.19 कोटी रुपये मिळाले आहेत. या सुरुवातीच्या ट्रेंडमुळे चित्रपटाच्या बॉक्स ऑफिस ओपनिंगबाबतही चर्चा रंगली आहे. सध्याच्या ॲडव्हान्स बुकिंगच्या वेगानुसार भारतात चित्रपटाची ओपनिंग सुमारे 40 कोटी रुपयांपर्यंत जाऊ शकतं, असा अंदाज काही ट्रेड रिपोर्ट्समध्ये व्यक्त करण्यात आला आहे.

2022 मध्ये प्रदर्शित झालेल्या अजय देवगणच्या ‘दृश्यम 2’ने पहिल्या दिवशी भारतात 15.38 कोटी रुपये नेट कमावले होते. त्यानंतर पहिल्या वीकेंडमध्ये चित्रपटाने 64.14 कोटी रुपयांची कमाई केली होती. त्यामुळे ‘दृश्यम 3’च्या जोरदार ॲडव्हान्स बुकिंगमुळे या जुन्या आकड्यांशी तुलना सुरू झाली आहे. विशेष म्हणजे, ‘दृश्यम 3’ने रिलीजपूर्वीच ‘दृश्यम 2’च्या अंतिम ॲडव्हान्स बुकिंगच्या आकड्याला मागे टाकल्याचंही कळतंय. त्यामुळे चित्रपटाच्या ओपनिंगकडे आता प्रेक्षक आणि बॉक्स ऑफिस विश्लेषकांचं लक्ष लागलं आहे.

‘दृश्यम 3’मध्ये अजय देवगण पुन्हा विजय साळगावकरच्या भूमिकेत दिसणार आहे. त्याच्यासोबत तब्बू, श्रिया सरन, रजत कपूर आणि इशिता दत्ता यांच्यासह जॅकी श्रॉफ आणि काही नव्या कलाकारांचीही भर पडली आहे. दिग्दर्शनाची जबाबदारी अभिषेक पाठक यांनी सांभाळली आहे. चित्रपट 2 ऑक्टोबर 2026 रोजी प्रदर्शित होणार आहे. ‘दृश्यम’ फ्रँचायझीच्या आधीच्या दोन्ही भागांना मिळालेला प्रतिसाद पाहता तिसऱ्या भागाकडूनही मोठ्या अपेक्षा आहेत. त्यामुळे प्रदर्शनानंतर ‘दृश्यम ३’ प्रत्यक्षात किती कमाई करतो, हे पाहणं महत्त्वाचं ठरणार आहे.