एकाच दिवशी अपघातांमध्ये दोन सेलिब्रिटींचं निधन; चक्काचूर झाली कार, रजनीकांत यांच्याकडून शोक व्यक्त
मंगळवारी दोन वेगवेगळ्या रस्ते अपघातांमध्ये दाक्षिणात्य चित्रपटसृष्टीतील दोन कलाकारांनी आपले प्राण गमावले. प्रसिद्ध चित्रपट निर्माते आर. बी. चौधरी यांचं उदयपूरमधील कार अपघातात निधन झालं. तर मल्याळम अभिनेते संतोष नायर यांचाही मृत्यू झाला.
दाक्षिणात्य चित्रपटसृष्टीतील दोन सेलिब्रिटींचं मंगळवारी एकसारख्याच अपघातात निधन झालं. एकीकडे 5 मे रोजी सकाळी मल्याळम अभिनेते संतोष नायर यांनी रस्ते अपघातात आपले प्राण गमावले, तर याच दिवशी दुपारी आणखी एक भीषण अपघात झाला. या अपघातात दाक्षिणात्य चित्रपटसृष्टीतील प्रसिद्ध निर्माते आर. बी. चौधरी यांचं निधन झालं. तेलुगू, तमिळ आणि मल्याळम भाषांमध्ये जवळपास 100 हून अधिक चित्रपटांची निर्मिती करणारे आर. बी. चौधरी यांनी मंगळवारी अखेरचा श्वास घेतला. उदयपूरमध्ये त्यांच्या कारचा भीषण अपघात झाला आणि या अपघातात त्यांच्या गाडीचा पूर्णपणे चक्काचूर झाला. अपघातात ते गंभीर जखमी झाले होते आणि त्यांना तातडीने रुग्णालयात दाखल करण्यात आलं होतं. परंतु त्यांचा जीव वाचवता आला नाही.
आर. बी. चौधरी हे साऊथ फिल्म इंडस्ट्रीतील एक मोठं नाव आहे. त्यांच्या निधनाच्या वृत्ताने संपूर्ण कलाविश्वावर शोककळा पसरली आहे. त्यांचं पार्थिव आज (6 मे) चेन्नईमध्ये आणलं जाईल आणि याच ठिकाणी त्यांच्यावर अंत्यसंस्कार केले जातील. सुपरस्टार रजनीकांत यांनी एक्स (ट्विटर) अकाऊंटवर पोस्ट लिहित आर. बी. चौधरी यांच्या निधनाबद्दल शोक व्यक्त केला. त्यांनी लिहिलं, ‘माझे प्रिय मित्र, सुपर गुड फिल्म्सचे आर. बी. चौधरी हे एक उत्कृष्ट निर्माते होते. एक अद्भुत माणूस. त्यांनी असंख्य तरुण दिग्दर्शकांना संधी दिली. त्यांच्या अकाली निधनाच्या बातमीने मला मोठा धक्का बसला आहे. मी खूप दु:खी झालो आहे. त्यांच्या कुटुंबीयांप्रती मी संवेदना व्यक्त करतो, त्यांच्या आत्म्यास शांती लाभो.’
என் அருமை நண்பர் சூப்பர் குட் ஃப்லிம்ஸ் ஆர்.பி. செளத்ரி அவர்கள் தலை சிறந்த தயாரிப்பாளர். அருமையான மனிதர். எத்தனையோ இளம் இயக்குநர்களுக்கு வாய்ப்பளித்து திரையுலகை வாழவைத்தவர்.
அவருடைய அகால மரணச் செய்தி எனக்கு பேரதிர்ச்சியையும், மிகுந்த வேதனையையும் அளிக்கிறது.
அவர்…
— Rajinikanth (@rajinikanth) May 5, 2026
आर. बी. चौधरी यांनी 1988 मध्ये ‘सुपर गुड फिल्म्स’ नावाची स्वत:ची निर्मिती कंपनी सुरू केली. याच बॅनरखाली त्यांनी ‘अधिपापम’ हा पहिला मल्याळम चित्रपट त्यांनी बनवला. त्यानंतर त्यांनी तेलुगू आणि तमिळमध्येही चित्रपट निर्मिती सुरू केली. त्यांचा शेवटचा चित्रपट ‘मॅरिसन’ हा होता, जो जुलै 2025 मध्ये प्रदर्शित झाला. ‘पुष्पा’ फेम फहाद फासिलने यात मुख्य भूमिका साकारली होती. आर. बी. चौधरी यांच्या काही लोकप्रिय चित्रपटांमध्ये ‘लव्ह टुडे’, ‘जॉली’, ‘मिस्टर रोमियो’ आणि ‘एसीपी शिवा’ यांचा समावेश आहे.
मल्याळम अभिनेते संतोष नायर यांचंही मंगळवारी सकाळी साडेसहाच्या सुमारास झालेल्या कार अपघातात निधन झालं. ते त्यांच्या पत्नीसोबत प्रवास करत होते. केरळच्या पथानामथिट्टा जिल्ह्यातील अडूरजवळील एनाथू परिसरात हा अपघात झाला. त्यांच्या कारवरील नियंत्रण सुटलं आणि ती एका लॉरीला धडकली. या अपघातात ते गंभीर जखमी झाले आणि नंतर रुग्णालयात त्यांना हृदयविकाराचा झटका आला. या अपघातात त्यांच्या पत्नी गंभीर जखमी झाल्या असून त्यांच्यावर उपचार सुरू आहेत.
