संजय कपूरच्या 30 हजार कोटींच्या संपत्तीबाबत कोर्टाची मोठी अपडेट; करिश्माच्या मुलांना काय मिळणार?

अभिनेत्री करिश्मा कपूरचा पूर्व पती संजय कपूर याच्या 30 हजार कोटींच्या संपत्तीवरून कोर्टात वाद सुरू आहे. संजय कपूरचं गेल्या वर्षी लंडनमध्ये पोलो खेळताना निधन झालं होतं. तेव्हापासून त्याच्या संपत्तीवरून कुटुंबीयांमध्ये वाद सुरू आहे. संजयच्या संपत्तीवरून आई राणी कपूर, पूर्व पत्नी करिश्मा कपूर, करिश्मा-संजयची दोन मुलं आणि तिसरी पत्नी प्रिया सचदेव कपूर आमने-सामने आहेत. याप्रकरणाच्या सुनावणीदरम्यान दिल्ली उच्च न्यायालयाने या संपूर्ण वादाला अत्यंत दु:खद परिस्थिती असल्याचं म्हटलं आहे. त्याचप्रमाणे कुटुंबाला परस्पर सहमतीने तोडगा काढण्याचा आणि मध्यस्थीचा गांभीर्याने विचार करण्याचा सल्ला दिला आहे.

संजय हा खूप मोठा उद्योगपती होता. तो सोना कॉमस्टार या कंपनीचा तो अध्यक्ष होता. जून महिन्यात पोलो खेळताना हृदयविकाराचा झटका आल्याने त्याचं निधन झालं होतं. संजयची संपत्ती तब्बल 30 हजार कोटी रुपये असल्याचं म्हटलं जात आहे. 2016 मध्ये करिश्मा कपूरला घटस्फोट दिल्यानंतर संजयने 2017 मध्ये मॉडेल प्रिया सचदेवशी लग्न केलं होतं. संजयच्या निधनानंतर करिश्माने तिच्या दोन मुलांच्या वतीने दिल्ली उच्च न्यायालयात याचिका दाखल केली होती. या याचिकेतून प्रिया सचदेववर काही आरोप करण्यात आले होते. संजय कपूरच्या मालमत्तेचा वाद दिल्ली उच्च न्यायालयात पोहोचला तेव्हा प्रियाने दावा केला की संजयची संपूर्ण वैयक्तिक संपत्ती 2025 मध्ये केलेल्या मृत्यूपत्रात तिला हस्तांतरित करण्यात आली होती. करिश्माच्या वतीने तिच्या दोन्ही मुलांनी आणि संजयची आई राणी कपूर यांनी या मृत्यूपत्राला न्यायालयात आव्हान देत ते फसवं असल्याचं म्हटलं होतं.

दिल्ली उच्च न्यायालयात या खटल्याच्या सुनावणीदरम्यान न्यायमूर्ती मिनी पुष्कर्ण यांनी सांगितलं की, या वादामुळे संपूर्ण कुटुंबाला मानसिक आणि भावनिक नुकसान सहन करावं लागत आहे. देवाने कुटुंबाला अशी संपत्ती दिली आहे जी अंतर्गत कलहात वाया घालवण्यापेक्षा सर्वांनी सामंजस्याने वाटून घ्यावी. यावेळी दिल्ली उच्च न्यायालयाने प्रिया कपूरचं प्रतिनिधित्व करणाऱ्या वकिलाला सांगितलं की, त्यांच्या क्लायंटने म्हणजेच प्रिया सचदेवने मध्यस्थीसाठी पुढील पावलं उचलावीत.

न्यायालयाने सर्व पक्षकारांना पुढे असंही सांगितलं की प्रिया आता एकटी आहे आणि तिला तिच्या मुलांचीही काळजी घ्यायची आहे. कोर्टाने सर्व पक्षकारांच्या वकिलांना निर्देश दिले की ते त्यांनी आपापल्या क्लायंटशी बोलून त्यांना मध्यस्थीसाठी तयार करावं. संजय कपूरची आई राणी कपूरने जवळपास 28 हजार कोटी रुपयांचा अंतरिम डिविडेंड प्रिया कपूरला देण्यावर स्थगिती देण्याची विनंती केली आहे. तर प्रियाने याचिका फेटाळण्याची मागणी केली आहे. या दोन्ही याचिकांवर नोटीस बजावण्यात आल्या आहेत. या प्रकरणाची पुढील सुनावणी 23 मार्च रोजी होईल.