Makarand Anaspure : पत्नीला कॅन्सर, मी टेन्शनमध्ये आलो…मकरंद अनासपुरे यांनी सांगितला प्रसंग
Makarand Anaspure : मकरंद अनासपुरे यांच्या पत्नीला कॅन्सर झालेला, त्यावेळी नाना पाटेकर त्यांच्या पाठीशी खंबीरपणे उभे होते. याबद्दल मकरंद अनासपुरे यांनी सांगितलं आहे.
नाना पाटेकर आणि मकरंद अनासपुरे यांच्यात चांगली मैत्री होती. नाना पाटेकर यांच्या निधनानंतर मकरंद अनासपुरे भावुक झाले होते. अशातच आता एका मराठी वृत्तपत्रासाठी लिहिलेल्या लेखात मकरंद अनासपुरे यांनी नाना पाटेकर यांच्या आठवणी सांगितल्या आहेत. मकरंद अनासपुरे यांनी सांगितलं की, ते नाना पाटेकर यांना गुरुजी मानायचे. तसेच, गुरुजींकडून मिळालेल्या अनेक धड्यांपैकी हा एक महत्त्वाचा धडा. गुरुजींची चव काही जणांसाठी आंबट, तिखट, कडवट तर काही जणांसाठी गोड असेल. मी सुदैवाने त्यांची गोड चव कायमच अनुभवत राहिलो, असंही मकरंद अनासपुरे यांनी सांगितलं.
मकरंद अनासपुरे यांच्या पत्नीला झालेला कॅन्सर
मकरंद अनासपुरे म्हणाले की, ‘काही वर्षांपूर्वी माझी पत्नी शिल्पाला ब्रेस्ट कॅन्सरचे निदान झालं. मी खूप टेन्शनमध्ये आलो. शिल्पानं मला दम दिला की, ‘माझ्या या आजाराविषयी कुणाला काही बोलू नकोस. जर मला कोणी सहानुभूती द्यायला आले तर मी तुला मारीन.’ पण मी गुरुजींपासून काही लपवत नसल्यामुळे त्यांना सांगितलं. त्यांनी लगेचच डॉक्टर राजेंद्र बडवे यांना फोन केला. त्यानंतर तिच्या सगळ्या केमो आणि सर्जरीमध्ये सुद्धा सातत्यानं त्यांनी मला भक्कम पाठिंबा दिला. ती बरी झाली. त्यावेळी मला खूप त्रास होऊ नये, याची सर्वतोपरी काळजी गुरुजींनी घेतली. माझ्याशी वेगवेगळ्या विषयांवर बोलत बसायचं. अनुभव, गमतीदार गोष्टी सांगायचे. आज बायको ठणठणीत बरी झाली. त्याचं श्रेय ती, तिच्या डॉक्टरांबरोबरच गुरुजींनासुद्धा आहे. तिच्या परवानगीनं जाहीरपणे आज हे सांगतो आहे.’
‘उत्साहाने कुठल्याही गोष्टीला स्वतःचं स्टारडम न मिळवता मदत करायला गुरुजींना आवडायचं. ठाण्यातल्या ठाणे आर्ट गॅलरीच्या एका कार्यक्रमाच्या वेळी गुलजार साहेबांची एक कविता, ‘किताबे’ त्यांना नानांच्या आवाजात पाहिजे होती. तेव्हा त्यांनी मला विचारलं की, नाना हे करतील का? मी त्यांना फोन केला. ते म्हणाले, अरे मला आवडेल. त्यांनी त्या कार्यक्रमासाठी वेळ काढून ती कविता रेकॉर्ड करून दिली. ‘यशवंत’ सिनेमाचं जुहू चौपाटीवर शूटिंग होतं. ढोलक वाजवून पैसे गोळा करणाऱ्या रस्त्यावरच्या मुलाला सिनेमात घेतलं होतं. शॉटच्या मध्ये रिकाम्या वेळात नाना त्याला वेगवेगळ्या पद्धतीने ढोलक कसा वाजवायचा, मग जास्त पैसे कसे मिळतील, हे शिकवत होते. शूटिंग संपल्यानंतर प्रॉडक्शन टीमला त्यांनी त्या मुलाला हजार रुपये द्यायला लावले. शिवाय स्वतःही काही पैसे दिले. हा त्यांचा दिलदारपणा शेकडो जणांनी अनुभवला असेलच.’ असं मंकरंद यांनी शेवटी सांगितलं. ‘लोकमत‘या वृत्तपत्रासाठी मकरंद अनासपुरे यांनी लेख लिहिला आहे.
