Bhau Kadam: भाऊ कदम झळकणार दुहेरी भूमिकेत; ‘घे डबल’ चित्रपटाची उत्सुकता

Bhau Kadam: भाऊ कदम झळकणार दुहेरी भूमिकेत

Image Credit source: Instagram

मराठी पडद्यावर विनोदी आणि धमाकेदार चित्रपटाचं लवकरच आगमन होणार आहे आणि या चित्रपटाचं मुख्य आकर्षण ठरणार कॉमेडी स्टार भाऊ कदमची (Bhau Kadam) दुहेरी भूमिका. जिओ स्टुडिओज व फाईन क्राफ्ट निर्मित ‘घे डबल’ (Ghe Double) या चित्रपटाचं भन्नाट टीझर पोस्टर सोशल मीडियावर झळकलं आहे. येत्या 30 सप्टेंबर रोजी चित्रपटगृहात झळकणाऱ्या या चित्रपटात भाऊ कदम आणि भूषण पाटील (Bhushan Patil) यांची जबरदस्त जोडी प्रेक्षकांचं मनोरंजन करण्यास तयार आहे. या चित्रपटाचं दिग्दर्शन विश्वास जोशी यांनी केलं असून ज्योती देशपांडे आणि जिओ स्टुडिओज चित्रपटाचे निर्माते आहेत.

चित्रपटाचे दिग्दर्शक विश्वास जोशी म्हणतात, “जिओ स्टुडिओज वेगवेगळ्या विषयांवर चित्रपट करण्याचा प्रयत्न करत आहे. आणि त्यातच ‘घे डबल’ हा विनोदी चित्रपट ते सादर करत आहेत. हा एक निखळ मनोरंजन करणारा कौटुंबिक चित्रपट असून यात भाऊ कदम आणि भूषण पाटील हे दोघं विनोदवीर धुमाकूळ घालणार आहेत आणि मला खात्री आहे की हा चित्रपट प्रेक्षकांचे डबल मनोरंजन नक्की करणार.”

भाऊ कदमचा ‘पांडू’ हा चित्रपटसुद्धा चांगलाच गाजला होता. यामध्ये त्याच्यासोबत सोनाली कुलकर्णी आणि कुशल बद्रिकेनं भूमिका साकारल्या होत्या. या चित्रपटात पांडू आणि महादू या दोन कोल्हापूरच्या लोककलावंतांची मजेशीर कथा प्रेक्षकांना पहायला मिळाली. बॉक्स ऑफिसवर या चित्रपटाने चांगला गल्ला जमवला होता. त्यामुळे आता भाऊ कदमचा हा आगामी चित्रपट कसा असेल, याची उत्सुकता निर्माण झाली आहे.