Timepass 3: “अशी पालवी जी फुटत नाय, फोडते”; टाईमपास 3 मध्ये हृता दुर्गुळेचा कधीही न पाहिलेला अंदाज

Timepass 3 Official Teaser

Image Credit source: Youtube

रवी जाधव (Ravi Jadhav) दिग्दर्शित ‘टाईमपास 3’ (Timepass 3) या बहुप्रतिक्षित आणि बहुचर्चित चित्रपटाला टीझर नुकताच प्रेक्षकांच्या भेटीला आला आहे. ‘टाईमपास’च्या सीरिजमधील या तिसऱ्या भागात अभिनेत्री हृता दुर्गुळे (Hruta Durgule) आणि प्रथमेश परब (Prathamesh Parab) यांच्या मुख्य भूमिका आहेत. या चित्रपटात हृताचा कधीही न पाहिलेला अंदाज प्रेक्षकांना पहायला मिळणार आहे आणि त्याचीच झलक या टीझरमध्ये दाखवण्यात आली आहे. ‘आई बाबा आणि साईबाबा शप्पथ, आणतोय तीच मजा, तोच टाईमपास एका वेगळ्या अंदाजात. पाहा दगडू आणि पालवीच्या गोष्टीची झलक,’ असं कॅप्शन देत हृताने सोशल मीडियावर हा टीझर शेअर केला आहे.

‘लहानपणी टाईमपास म्हणून झालेल्या लव्हपासून लग्नाच्या लोच्यापर्यंतची स्टोरी सगळ्यांनी पाहिली. पण त्या प्रवासात अजून एक गोष्ट होती. जी सांगायची राहिलीच ना रे,’ अशा संवादाने या टीझरची सुरुवात होते. सुरुवातीला दगडू आणि प्राजक्ताची झलक दाखवल्यानंतर पालवीची धमाकेदार एण्ट्री होते. “आपन पालवी दिनकर पाटील, अशी पालवी जी फुटत नाय, फोडते,” अशा दमदार डायलॉगवर हृताच्या चेहऱ्यावर पडदा उचलण्यात येतो. “आपल्या दोस्ताला जो नडेल, त्याचा आपन मार्बल फोडेल”, “मनाचा डोअर ओपन ठेवला की ज्ञानाचा लाईट कधी कुठून कसा येईल काही सांगता येत नाही”, असे एकापेक्षा एक भन्नाट डायलॉग या टीझरमध्ये ऐकायला मिळतात. या टीझरमध्येही शाकालचीही झलक पहायला मिळते.

पहा टीझर

2014 मध्ये ‘टाईमपास’ हा चित्रपट प्रदर्शित झाला होता. प्रथमेश परब आणि केतकी माटेगावकरने यात मुख्य भूमिका साकारल्या होत्या. त्यानंतर 2015 मध्ये प्रदर्शित झालेल्या ‘टाईमपास 2’मध्ये प्रियदर्शन जाधव आणि प्रिया बापटने मुख्य भूमिका साकारल्या. या दोन्ही चित्रपटांचं दिग्दर्शन रवी जाधवनेच केलं होतं. आता ‘टाईमपास 3’मध्ये हृता आणि प्रथमेशची नवी जोडी पहायला मिळतेय. या टीझरवर अनेकांनी कमेंट्स करत चित्रपटाची उत्सुकतेने वाट पाहत असल्याचं म्हटलंय.